Kryeministri Edi Rama u shpreh se Shqipëria po e kalon pandeminë e COVID pa plagë katastrofike, edhe pse çdo vdekje është e dhimbshme.
Kreu i qeverisë bëri një krahasim me vendet e Rajonit, ndërsa shtoi se në Shqipëri kanë humbur jetën mesatarisht 405 persona për 1 milion banorë.
‘Në Shqipëri kanë humbur jetën mesatarisht 405 persona për 1 milion banorë. Në Bosnjë dhe Maqedoni norma është më e lartë. Ne jemi në një nivel të pranueshëm dhe të arsyeshëm për të qenë të motivuar për të shkuar deri në fund pa plagë katastrofike. Përsa i përket menaxhimit të sistemit në vetëvete, flasin vetë faktet. Vlen të ngrihet një krahasim ndihmës mes ku ishim dhe ku jemi me strukturën spitalore.
Imagjinoni sikur kjo goditje të na kishte gjetur me infrastrukturën spitalore të 7 viteve më parë. Ne sot jemi në kushtet kur infrastruktura është po njësoj si në vendet e tjera përsa i përket vijës së zjarrit. Kemi kapacitete.
Do të kemi 400 mijë teste të shpejta që do vijnë në Shqipëri. Kemi të mbuluar skemën e rimbursimit të paketës bazë të barnave për trajtimin e COVID-19. Prej ditës së parë paguajmë 1000 euro plus çdo muaj mjekët.
