Drejtuesi politik i Lëvizjes Socialiste për Integrim në qarkun e Beratit, Ardit Çela ka vizituar sot Muzeun “Solomon” në Berat, në nderim të Ditës së Kujtesës
Sot vizitova Muzeun “Solomon” në Berat, në nderim të Ditës së Kujtesës ( Shoah ).
27 Janari është Dita e nderimit dhe kujtesës për miliona hebrenj, masakruar nga nazistët përgjatë Luftës II Botërore.
Qytetarët e Beratit janë shquar gjatë historisë për vlerat që ata mbartin, e sidomos për humanizmin e tyre. Pavarësisht statusit shoqëror, pavarësisht besimit, pavarësisht momenteve historike, ata kanë mirëpritur në çdo kohë ardhësit.
Ne sot kujtojmë me mirënjohje familjet e Beratit e të gjithë Shqipërisë, që hapën dyert e shtëpive të tyre për hebrenjtë, me plot fisnikëri në respekt të jetës, e duke qënë të gatshëm të ndanin me ta edhe vdekjen.
Ne sot kujtojmë me mirënjohje edhe Profesor Simon Vrushon, i cili me përkushtimin e tij, me urtësinë, mençurinë, dhe me pensionin e tij të varfër ideoi dhe ngriti Muzeun “Solomon”, këtë burim drite në mes të Beratit, e që rrezaton përtej hapësirave gjeografike e kohore, mirësinë e popullit tonë.
