Berisha nga maja e ballkonit: Të shkojmë në qeveri teknike e zgjedhje të lira

Ish-kryeministri Sali Berisha ka bërë thirrje për qeveri teknike në mënyrë që të shkohet në zgjedhje të lira. Në fjalën e tij para mbështetësve demokratë të mbledhur poshtë banesës së tij, Berisha u shpreh se duhet ti dalim përballë këtij regjimi për ta përmbysur.

Berisha po ashtu bëri thirrje që qytetarët t’i bashkohen protestës së thirrur nga Aleanca për Mbrojtjen e Teatrit.

“Shoqata për Mbrojtjen e Teatrit ka thirrur protestë ditën e premte para bashkisë së Tiranës. Qytetarë, demokratë dhe demokrate të gjithë në protestë në orën 11:00, të gjithë në protestë”, tha Berisha.

Pjese nga fjala e Berishes

Me 2 Prill të vitit 1991, të rinjtë e Shkodrës, qytetarët e Shkodrës dolën në protestë paqësore kundër vjedhjes dhe rrëmbimit të votës së tyre të lirë nga diktatura e fundit komuniste në Europë.

Në një akt hakmarrje primitive ndaj Shkodrës antikomuniste, falangat e krimit të diktaturës derdhën mbi të rinjtë dhe qytetarët e Shkodrës breshëri automatikësh dhe mitrolozësh.

Në këto sulme mizore, në këtë masakër të vërtetë ranë për votën e lirë për t’u bërë të pavdekshëm Arben Broci, ish-anëtar i kryesisë së PD, student themelues i kësaj partie.

Ranë bashkëluftarët e tij Bujar Bishanaku, Nazmir Kryeziu, Besnik Ceka dhe u plagosën 87 qytetarë të tjerë.

Të dashur miq, duke shprehur nderimin tonë më të madh për sakrificën e tyre që u bë dritë për shqiptarët, sakrificë që çeli dyert e votës së lirë në Shqipëri, sakrificë që jehoi në të katër anët e planetit, theksoj dhe shtoj këtu se këtë vit ne jemi më të detyruar se kurrë ndaj martirëve të 2 Prillit.

Sepse sot njëlloj si në 1991-shin, ne jemi qytetarët e votës së vjedhur dhe kontrolluar nga pushteti.

Sepse sot njëlloj me 1991-shin, ne jemi qytetarë që po braktisim pasivisht vendin.

Njëlloj si në 1991-shin, regjimi bën gjithçka për të asgjësuar opozitën.

Ndaj dhe për ne, sakrifica dhe gjaku i martirëve të 2 Prillit duhet të na frymëzojë në një betejë të fuqishme për të rikthyer shqiptarëve votën e lirë.

Ata ranë që Shkodra dhe Shqipëria të votojnë në liri.

Ata nuk duruan, nuk ulën kokën po dolën ballë për ballë regjimit të egër.

Ndaj dhe ne, o sot o kurrë, duhet të dalim ballë për ballë këtij regjimi dhe ta përmbysim atë.

Të shkojmë në qeveri teknike dhe zgjedhje të lira