Teksa bota nuk ka vaksina, deri në këto momente në Izrael raportohet se janë vaksinuar mbi 4 milionë banorë me dozën e parë, ose ndryshe 45 për qind e popullsisë.
Ndërsa me dozën e dytë janë vaksinuar mbi 3 milionë banorë. Përveç kësaj, në Izrael po bëhet një fushatë krejt e veçantë për të shtyrë vaksinimin edhe te të rinjtë, të cilët avash-avash po i kthehen jetës së natës.
Ajo quhet “Vaccine bar” dhe nënkupton qendra vaksinimi të ngritura në zonën më të frekuentuar nga të rinjtë dhe kushdo që vaksinohet kundër Covid-19 e ka birrën falas.
Kjo u diskutua sot në emisionin “Shqipëria Live”, ku në lidhje “Skype” nga Izraeli ishte shqiptari, Xhorxh Arditi, i cili tha se është turp të shkosh të bësh vaksinë për një birrë falas.
“Unë kam dy muaj që kam bërë dy dozat e vaksinës, dhe ndihem shumë mirë, i lehtësuar. Do më vinte turp të shkoja të pija birrë. Është turp që me miliona njerëz vënë në dyshim mjekësinë. Mjeku është profesionisti më i ndërgjegjshëm që ekziston. Të vaksinohemi sepse na shpëton jetën. Unë vaksinohem çdo vit për gripin, jo më për këtë që është më e rëndësishme”, tha ai.
Sipas tij, kjo nisma e birrës i ka tërhequr shumë të rinjtë. “Tani është një festë këtu si tip karnavalesh dhe të rinjtë janë grumbulluar, e kemi frikë se do sjellin një valë të dytë. Të rinjtë nuk janë vaksinuar shumë, ndërsa të moshuarit po”, tha Arditi.
I pyetur nëse ka patur efekte anësore, Xhorxh tha se nuk ka patur asnjë problem.
“Nëse të dhemb pak krahu nuk do të thotë se është efekt anësor. Janë të paktë ata që kanë nevojë për ndihmë pas vaksinës. Duhet të ketë besim te mjekësia, e sidomos te organet më të mëdha”, tha ai, i cili shtoi: “Unë dal në rrugë me maskë, vaksina nuk është 100 për qind mbrojtëse, të mbron 95 për qind, ama ekziston një rrezik i vogël”.
