Sipas të dhënave të INSTAT nga Anketa Strukturore e Ndërmarrjeve më 2019, investimet u rritën me 1,5 %, duke arritur vlerën e 242 miliardë lekëve, në krahasim me 238 miliardë lekë në 2018. Por të strukturuara sipas grupimeve kryesore shihet një prirje e investimeve për ndërtime dhe instalime që nuk përfshijnë objekte të reja. Ky zë pa rritjen më të madhe me rreth 20% në vitin 2019, në raport me 2018-en. Ndërsa investimet në makineri pajisje dhe toka kanë shënuar rënie me përkatësisht 17 dhe 40 për qind më 2019.
Zëri më i madh i investimeve të biznesit, mbetet zëri “ investime të tjera” me 67 miliardë lekë më 2019 me një rritje vjetore prej 25%. Zëri i dytë më i madh janë investimet në “Instalimet teknike në makineri dhe pajisje”. Ky zë në vitin 2019 arriti në 64.8 miliardë lekë duke shënuar rënie me 17%. Zëri i tretë më i madh janë investimet në “Ndërtime dhe instalime”, me një vlerë totale të shpenzuar me 40 miliardë lekë më 2019 me rritje 20% në raport me 2018.
Ulja më e madhe e investimeve ka ardhur në pasuri të paluajtshme të tilla si tokat. Më 2019 bizneset aktive në vend shpenzuan 9 miliardë lekë në blerjen e tokave me një rënie 40% në raport me vitin e mëparshëm.
Nga sektorët kryesore të ekonomisë investimet më të mëdha në vitin 2019 u bënë nga bizneset e energjisë, ujit dhe trajtimit të mbetjeve me rreth 76 miliardë lekë. Këto biznese ndonëse të paktë në numër zunë 31 për qind të totalit të investimeve totale të biznesit më 2019. investimet në energjetike edhe më 2019 u mbështeten nga dy projektet e mëdha të investimeve në këtë sektor, gazsjellësi TAP dhe HEC-et në lumin Devoll.
Sektori i tregtisë u rendit i dyti me 40 miliardë lekë investime më 2019 , duke zënë 16.7% të totalit më 2019. Në vend të tretë ishte industria përpunuese më 28.5 miliardë lekë investime me 11.8 për qind të totalit dhe i katërti i ishte sektori i ndërtimit me 26 miliardë lekë investime ose 10.8 për qind e totalit të investimeve më 2019.
Ndërmarrjet me 50 e më shumë të punësuar realizuan 55,8% të totalit të investimeve. Këto subjekte përbëjnë vetëm 1,4 % të ndërmarrjeve aktive.
Ndërmarrjet me 1-4 të punësuar realizuan 6,7 % të investimeve edhe pse përbëjnë 85,4 % të ndërmarrjeve aktive në vend.
Sipas klasifikimit të INSTAT, investimet e biznesit përfaqësojnë vlerën e mallrave afatgjata të blera prej ndërmarrjeve ose të krijuara për llogari të vet me qëllim përdorimi për një periudhë jo më të vogël se një vit në procesin e prodhimit, përfshirë tokën.
Revista Monitor/
