GJENEVË– Platforma e ndarjes së vaksinave COVAX pret që të ketë 25 milion doza të vaksinave koronavirus për rajonin e Mesdheut Lindor në Mars, duke u rritur në 355 milion doza deri në Dhjetor të 2021, tha të Mërkurën një zyrtar i Organizatës Botërore të Shëndetësisë (OBSH).
Dozat e para të parashikuara për rajonin përmes COVAX do të mbërrijnë në Shkurt, u tha gazetarëve zyrtari i OBSH-së Yvan Hutin. Rajoni i Mesdheut Lindor përbëhet nga vendet e Lindjes së Mesme si dhe Afganistani, Pakistani, Somalia dhe Xhibuti, raporton Reuters.
COVAX drejtohet nga aleanca e vaksinave GAVI, OBSH dhe të tjerët, dhe është krijuar për të siguruar qasje të barabartë në vaksinat COVID-19 globalisht. COVAX ka thënë se synon të japë 1.8 miliardë doza në vendet e varfëra këtë vit. Të paktën pesë vende në rajonin e Mesdheut Lindor do të përfitojnë nga vala e parë e vaksinave COVAX edhe pse lista e vendeve nuk është konfirmuar ende, tha Richard Brennan, një zyrtar i dytë i OBSH.
Vendet me popullsi më të madhe, të ardhura më të ulëta dhe sisteme më të dobëta shëndetësore që pritet të bëjnë përparim më të ngadaltë vaksinimi do të kenë përparësi në përhapjen e vaksinave COVAX, thanë zyrtarët. Tetë vende në Mesdheun Lindor kanë filluar fushatat e vaksinimit. Dhjetë vende në rajon kanë dokumentuar një ose më shumë variante të koronavirusit, megjithëse ka të ngjarë që variantet të jenë përhapur më tej, tha Brennan.
