Gjendet në Astir mjeti luksoz i vjedhur në Rinas, policia jep detajet

Dy persona janë shpallur në kërkim për vjedhjen e një makine. Mësohet se një 42-vjeçar dhe një 36-vjeçar kanë vjedhur në Rinas një makinë tip ‘Range Rover’ dhe më pas e kanë vendosur në një parking në Astir. Në mënyrë që të mos kapeshin, të dy ata kanë bllokuan sistemin GPS të makinës.

Njoftimi i Policisë:

Rinas Vodhën një automjet tip “Range Rover”, nga parkingu i aeroportit, identifikohen 2 autorët e dyshuar dhe vijon puna nga Policia, për kapjen e tyre. Gjendet në garazhin e një pallati në Astir dhe sekuestrohet automjeti i vjedhur. Sekuestrohen edhe pajisje të ndryshme të përdorura nga autorët, për bllokimin e GPS-së së automjetit të vjedhur, dhe sende të tjera të përdorura për vjedhjen e tij. Shërbimet e Komisariatit të Policisë Rinas, pas kallëzimit nga një shtetas, për vjedhjen e automjetit të tij “Range Rover” nga parkingu i aeroportit “Nënë Tereza”, bazuar në informacionet e siguruara nga inteligjenca informative, na bashkëpunim me Seksionin për Hetimin e Krimeve të Rënda të DVP Tiranë, kanë organizuar punën për zbardhjen e vjedhjes së këtij automjeti.

Nga veprimet hetimore është bërë i mundur identifikimi i 2 autorëve të dyshuar të vjedhjes së automjetit tip “Range Rover”, shtetasve E. M., 36 vjeç dhe B. H., 42 vjeç, të dy banues në Tiranë. Këta dy shtetas dyshohen se në orët e para të datës 07.06.2023, kanë vjedhur automjetin tip “Range Rover”, të cilin shtetasi Ç. A. e kishte parkuar në parkingun e aeroportit, dhe më pas kanë përdorur pajisje të ndryshme për bllokimin e GPS-së së automjetit. Si rezultat i kontrolleve është bërë e mundur edhe gjetja në garazhdin e një pallati, në Astir, e automjetit të vjedhur, i cili u sekuestrua në cilësinë e provës materiale. Gjithashtu, në cilësinë e provës materiale janë sekuestruar pajisjet e përdorura për bllokimin e GPS-së së automjetit dhe sende të tjera të përdorura për hapjen e automjetit. Vijon puna për kapjen e 2 shtetasve të shpallur në kërkim dhe për dokumentimin e plotë të kësaj vjedhjeve. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme, për veprën penale “Vjedhja”, kryer në bashkëpunim.