Artistët shqiptarë janë bashkuar në një ekspozitë me piktura e skulptura në Muzeun Historik Kombëtar. Pavarësisht se jetojmë në kushte pandemie, kjo ekspozitë u rikthye sërish me edicionin e pestë të saj për të prezantuar punimet më të mira të artistëve ndër breza. Pikërisht për këtë arsye edhe ekspozita mban titullin “Breza në artet figurative”.
Në ekspozitë prezantohen 10 skulptura nga 4 artistë të shquar, ndërsa pjesa tjetër janë piktura. Piktori Robert Përmeti, që është edhe organizatori i ekspozitës, ka treguar se ku qëndron e veçanta e “Breza në artet figurative” në krahasim me ekspozitat e tjera.
“Në punët e prezantuara në tablo pikture mbizotëron teknika e vajit. E veçanta e kësaj ekspozite në punët e prezantuara nga autorët pjesëmarrës në raport me të tjerat, mbizotëron tabloja kompozicionale dhe portreti. Prioritetin më të madh në pikturë e ka kompozicioni. Dhe pak hyjnë dhe natyrat e qeta, peisazhet, etj”, është shprehur Përmeti.
Këtë vit janë prezantuar veprat nga piktorët më të njohur, disa prej të cilëve nuk jetojnë më. Vizitorët do të kenë mundësi të shikojnë në ekspozitë piktura nga artistë si Fadil Pëllumbi, Guri Madhi, Sali Shijaku, Shaban Hysa, Xhevdet Dada, Lec Shkreli, Nikolin Ivanaj, Romeo Goliku, Robert Përmeti, Anastas Kostandini, Leka Rudha, Llambrini Dena, Emiona S. Nako, Pëllumb Bylyku, Vehap Kokalari, Idriz Balani, Nesti Taço, Dylber Neziri, Bardha Buza, Majlinda Alia, Blerta Xhomo, Gjergji Meta, Gëzim Hidri, Greta Tahiraga, Altin Ahmeti, Elvis Goliku dhe Eni Veveçka.
Kjo ekspozitë do të qëndrojë e hapur për publikun në Muzeun Historik Kombëtar deri në datë 30 dhjetor.
icon/
