Turizmi në Shqipëri ndodhet në dilemën dhe paqartësitë më të mëdha, ndërkohë që një vit ende i vështirë na pret përpara.
Përveç humbjeve të mëdha ekonomike, operatorët turistikë theksojnë se humbja më e madhe e sektorit është në radhët e burimeve njerëzore të kualifikuara, të cilat është gati e pamundur të rikuperohen, pasi janë larguar.
Shoqatat e turo-operatorëve konsiderojnë se nëse rimëkëmbja do të nisë pa humbur kohë pas prillit të këtij viti, ajo mund të zgjasë deri në vitin 2023.
Në një lidhje skype për “Wake Up”, Kliton Gërxhani nga Shoqata Shqiptare e Tur Operatorëve dhe Agjencive Turistike tha se turizmi është sektori më i goditur në vitin që sapo lamë pas.
“Turizmi është goditur shumë vitin që shkoi, është sektori më i goditur. Realisht kemi pasur një humbje shumë të madhe në këtë sektor dhe jo vetëm bizneset, pro edhe ekonomia shqiptare.
Nga përllogaritjet tona humbja mund të shkojë në 1.5-1.8 miliardë euro, sepse ne besojmë se volumi që është bërë në 2020 ka qenë 20-30 për qind e volumit të totalit që është bërë në 2019. Flitet për një humbje shumë të madhe në ekonomi”, theksoi ai.
