‘Luani’ që zhduku Modric dhe De Bruyne

KATAR – Spanja ka ‘ranë’ në raundin e 16-të me një ‘arrë të fortë’: Marokun. ‘Luanët e Atlasit’ kanë demonstruar aftësi të jashtëzakonshme mbrojtëse: goli i Aguerd (a) në fitoren ndaj Kanadasë (1-2) i dha fund 662 minutave pa pësuar gol.

Duhet mbajtur mend se në eliminatoret e Kupës së Botës, edhe me Halilhodzic në stol, ata pësuan vetëm tre gola në tetë ndeshje. Jo çdo gjë është merita e Bonos në portë apo linjës mbrojtëse të përbërë nga Achraf, Aguerd, Saïs dhe Mazraoui. Vetëm përpara pjesës së pasme del një ‘bastion’ i quajtur Sofyan Amrabat.

Mesfushori i Fiorentinës është kthyer në një nga surprizat e mëdha të Botërorit. “Ai është sulmuesi ynë i parë dhe mbrojtësi ynë i parë”,- shprehet Walid Regragui. Numrat e vërtetojnë të drejtën e tij. Vëllai i vogël i Nordin Amrabat, ish-lojtar i Málagas dhe Leganésit, është futbollisti maroken që kryen më shumë pasime (118 nga 133), ai që rikuperon më shumë topa (24) dhe ai që ndërpret më shumë pasime (5): Është një mur”, thekson ‘La Gazzetta’. “Ai ka tre mushkëri”, thekson ‘L’Équipe’.

Sofyan, për të cilin Fiorentina pagoi 19.5 milionë në vitin 2020 për Hellas Veronën, është bërë ‘guri’ themeltar i ‘Luanëve të Atlasit’. Nëse mbiemri i tij nuk ishte ‘Amrabat’, ai do të ishte në një klub të lartë europian.

Ish-lojtari i Bruges, Feyenoord dhe Utrecht, në fazën e grupeve zhduku Luka Modric, Hazard dhe De Bruyne, çka nuk kanë kaluar pa u vënë re. ‘Sky Sports’ siguron se Liverpool është i gatshëm të ofrojë 30 milionë për nënshkrimin e tij në merkaton e dimrit.

“Jam krenar për ty Sofyan. Në verë ai ishte shumë afër Tottenhamit, por nuk u arrit marrëveshje. Tani skuadrat që e duan atë do të duhet të qëndrojnë në radhë”,- tregon vëllai i tij Nordin për ‘De Telegraaf’. “Shpresoj që pas Katarit të nënshkruaj për një skuadër të madhe”, thotë Regragui.

Kjo, nëse ndodh, do të jetë në janar. Tani Gavi, Busquets dhe Pedri e presin atë. “Ne kemi bërë histori, është e pabesueshme. Ishte një grup i vështirë dhe ne dolëm të parët,” tha Amrabat pasi mundi Kanadanë. Kujdes me këtë ‘luan’… sepse ‘kafshon’.