Lufta e përgjakshme/ Putin: E tmerrshme të shohësh se si operohen fëmijët pa anestezi në Gaza

Rusia ka bërë thirrje për një zgjidhje politike të konfliktit izraelito-palestinez dhe grupi i vendeve BRICS mund t’i bashkohet, tha sot presidenti rus Vladimir Putin, duke folur në samitin online të grupit për mediat.

Putin tha se pauzat humanitare ishin një hap i duhur drejt paqes dhe ishte e rëndësishme të mos përfshiheshin vendet e tjera në konflikt.

“Qëndrimi i Rusisë është konsistent. Ne bëjmë thirrje për përpjekjet e përbashkëta të komunitetit ndërkombëtar për të de-përshkallëzuar situatën, për të pushuar zjarrin dhe për të gjetur një zgjidhje politike për konfliktin palestinezo-izraelit. Shtetet BRICS dhe vendet e rajonit mund të luajnë një rol vendimtar në këtë projekt”, tha presidenti rus.

“Situata aktuale e paqëndrueshme është udhëhequr nga dëshira e SHBA për të monopolizuar funksionet e zgjidhjes së konflikteve. Vdekja e mijëra njerëzve, shpërngulja masive e civilëve dhe shpërthimi i një fatkeqësie humanitare janë thellësisht shqetësuese. Një koleg sapo foli për vdekjen e një numri të madh fëmijësh. Kjo është e tmerrshme, por kur sheh sesi kryhen operacione te fëmijët pa anestezi, kjo sigurisht që shkakton emocione të veçanta”.” theksoi Putin.