Muzeu Kombëtar i Fotografisë “Marubi” është përzgjedhur mes 50 muzeve europianë që kanë sjellë risi të jashtëzakonshme në cilësinë publike në 40 vitet e fundit.
Renditja është bërë nga Routledge, në numrin e radhës së revistës “Rishikimi i Muzeve Influencues, katër dekada të inovacionit dhe cilësisë publike në muzetë europiane”.
Përzgjedhja është bërë nga profesionistë në fushën e muzeologjisë, të cilët kanë shërbyer dhe si juri për çmimin e Muzeut Europian të Vitit.
Muzeu Kombëtar i Fotografisë ‘Marubi’ u krijua në vitin 2016 dhe erdhi si nevojë për të evidentuar dhe promovuar arkivin fotografik të Dinastisë Marubi dhe fotografëve të tjerë të qytetit të Shkodrës, një trashëgimi kulturore unike në llojin e vet.
Në qendër të projektit të muzeut është trashëgimia e ‘Foto-Studio Marubbi’, themeluar në vitin 1856 nga Pietro Marubbi, piktori dhe fotografi italian i cili kishte ardhur dhe ishte vendosur në Shkodër në atë kohë.
Aktiviteti i studios ndër vite, do të drejtohej dhe pasurohej nga tre breza fotografësh deri në fillimin e viteve 1950 kur Gegë Marubi u detyrua t’i dorëzohej anonimatit kolektiv komunist duke u bashkuar me fotografët e tjerë në Kooperativën e Riparim-Shërbimeve, sektor i së cilës ishte edhe fotografia.
Muzeu i ri është krijuar si një hapësirë për të promovuar dialogun e vyer midis traditës dhe modernitetit, së kaluarës dhe së tashmes.
Në vitin 2017, muzeu ishte ndër finalistët e nominuar për çmimin prestigjioz EMYA si Muzeu Evropian i Vitit.
