DEKLARATË PËR SHTYP
GREAT një nismë e re për të mbështetur gratë rurale dhe zhvillimin në Shqipëri nga UN Women, FAO dhe Italian Cooperation (AICS).
10 shkurt 2021 – UN Women, FAO dhe Italian Cooperation prezantuan sot një nismë tre-vjeçare që do të kontribuojë në fuqizimin e grave rurale në Shqipëri dhe do të forcojë rolet dhe kontributin e grave në zhvillimin rural.
Në bashkëpunim me Ministrinë e Bujqësisë dhe Zhvillimit Rural, programi për ‘fuqizimin e grave në zonat rurale dhe turizmi’ (GREAT) do të zbatohet në Rajonet e Shkodrës, Vlorës dhe Gjirokastrës, duke kontribuar në zhvillimin e qëndrueshëm ekonomik të grave rurale dhe komuniteteve të tyre dhe duke rritur të ardhurat dhe aftësinë e tyre për të fituar punë.
Në Shqipëri, kontributi i grave në bujqësi është jetik, pasi 54% e grave të punësuara punojnë në këtë sektor. Megjithatë, një kontribut i tillë shpesh mbetet i padukshëm për shkak të niveleve të larta të informalitetit, i cili shpesh i lë ato pa mbrojtje ose përfitime shoqërore.
E pranishme në prezantimin e projektit, Ministrja e Bujqësisë dhe Zhvillimit Rural, Milva Ekonomi u shpreh: “Gratë përfaqësojnë pjesën më të madhe të forcës së punës në bujqësi dhe kanë nevojë të jenë të vlerësuara dhe të mbështetura ndaj nëpërmjet projektit GREAT synojmë fuqizimin e tyre. Pa dyshim që do të kenë një rol të shtuar në vendimmarrje dhe fuqizimin e tyre si nismëtare të disa ndryshimeve që ndodhin në zinxhirin e vlerave.”
Programi synon të zhvillojë kapacitetet e grave rurale për të zhvilluar biznesin e tyre, për t’u vetë-organizuar dhe regjistruar si grupe lokale dhe për të përmirësuar qasjen e tyre të financimit. Njëkohësisht, GREAT do të mbështesë bashkitë e synuara për t’i dhënë prparësi dhe për të promovuar bizneset e grave rurale, turizmin rural dhe për të zhvilluar zinxhirin e vlerave.
“Fuqizimi i komuniteteve rurale me mundësi të përshtatshme ekonomike kontribuon në mënyrë të konsiderueshme në zhvillimin e qëndrueshëm të Shqipërisë, për sa kohë që përpjekje të tilla i vendosin gratë rurale në qendër të vëmendjes si aktore të ndryshimit “, tha Përfaqësuesi i UN Women në Shqipëri, Michele Ribotta.
“Një rrugëtim të cilin jemi krenarë ta nisim së bashku me UN Women, me Ministrinë e Bujqësisë dhe Zhvillimit Rural, me FAO-n! Synimi ynë është të ndihmojmë në rritjen e sipërmarrjes së grave në bujqësi, duke mbështetur fuqizimin e tyre dhe njëkohësisht, zhvillimin ekonomik, shoqëror e turistik të zonave të interesuara, – theksoi Ambasadori Italian në Shqipëri Fabrizio Bucci.
Gratë rurale në Shqipëri përballen me shumë sfida sa i përket sigurisë së tyre ekonomike, të tilla si: mungesa e mbështetjes financiare, aksesi i dobët për të siguruar të drejtat e tokës, njohuri të kufizuara për bizneset fitimprurëse, mundësi e limituar për të hyrë në tregun e punës për shkak të angazhimit joproporcional në aktivitetet e papaguara dhe varësia e madhe nga anëtarët e familjes.
“FAO do të kontribuojë në këtë projekt me zhvillimin e zinxhirit të vlerave, përfshi edhe përqasjen ‘nga ferma tek turistët’, certifikimin e pronës dhe promovimin e prodhimeve autenike, të prodhuara specifikisht nga gratë rurale”, nënvizoi Përfaqësuesi i FAO-s në Shqipëri, Arben Kipi.
Programi do të promovojë një politikë dhe një mjedis legjislativ për fuqizimin ekonomik të grave, qasjen dhe kontrollin e tyre ndaj pasurive prodhuese.
Programi GREAT u zhvillua duke u bazuar në nevojat e identifikuara nga UN Women dhe FAO në bashkëpunim me Ministrinë e Bujqësisë dhe Zhvillimit Rural, sipas rekomandimeve të studimeve të ndryshme të ndërmarra nga këto entitete. Objektivat e tij kryesore janë në përputhje me prioritetet e Qeverisë dhe Agjencisë Italiane të Bashkëpunimit për Zhvillim (AICS Tiranë), në kontekstin e Axhendës 2030 për Zhvillimin e Qëndrueshëm dhe parimin e saj thelbësor për të mos lënë askënd pas.
