Jo thjesht krenari dhe pasion. “Tifozat Kuq e Zi” janë më tepër se kaq.
Grupimi i organizuar që ka për qëllim të mbështesë në çdo kohë Shqipërinë në sport, duke u kujdesur në mënyrë të veçantë për çështjen kombëtare dhe nderimin e heronjve, tashmë shfaqet në një tjetër dimension: Humanizmin!
Përpos angazhimit gjatë tërmetit tragjik të 26 nëntorit 2019, “Tifozat Kuq e Zi” nisën të grumbullonin fonde për dy prej zonave më të goditura nga katastrofa natyrore dhe njerëzore, Durrësin dhe Shijakun.
Ardit Saliaj nga “Tifozat Kuq e Zi” foli në “A2CNN” rreth këtij projekti kaq të bukur të fansave më të zjarrtë shqiptarë. “Pas tragjedisë që shkaktoi tërmeti, duke parë gadishmërinë e të gjithëve menduam të kontribuojmë edhe ne në një mënyrë. Ideja lindi që ne të marim përsipër cdo lloj menaxhimi, ne cdo gjë do e bëjmë vetë, por nga ana shtetërore dhe ligjore kemi kërkuar një ndihmë. Shpresojmë që gatishmëria të jetë në kohën e duhur. Kërkesa nga pala jonë ka qenë se ne kemi shprehur interes për të ndërtuar dy qendra shëndetësore. Pas konstatimeve në terrem morëm vendimin për dy ambulanca. Kërkesa ndaj institucioneve shtetërore ka qenë që të kemi evitim të taksave, si dhe kemi kërkuar të jemi në bashkëpunim me këtë fond që kemi krijuar. Ne si tifozeri kuq e zi kemi pasur marrëdhënie të ftohta me institucionet, por këtë herë menduam të thyejmë akujt sepse kombi është mbi gjithcka dhe këtë e bën flamuri kuq e zi. Si fillim ne nisëm mbledhjen e fondeve dhe fondi vazhdon të jetë i hapur. Mendojmë që marrëveshja të realizohet sa më shpejt.”
Grupimi i propozoi qeverisë shqiptare projektin e rindërtimit të dy godinave tejet të rëndësishme të dëmtuara nga tërmeti dhe pas një rrugëtimi të gjatë mes burokracive të institucioneve, më në fund morën lajmin e shumëpritur.
Këshilli i Ministrave miratoi dhe hyrjen në fuqi me efekt të menjëhershëm “të projektmarrëveshjes së bashkëpunimit për rindërtimin e dy qendrave shëndetësore në Bashkitë Durrës dhe Shijak”, në mbështetje të aktit normativ “Për përballimin e pasojave të fatkeqësisë natyrore”.
Një nismë që vlen më tepër se çdo gol. Përfshirje dhe angazhim, që i japin një kuptim edhe më të madh këngës “O sa mirë me qenë shqiptar!”.
