Pogradec – Një 32-vjeçar, i cili ishte shpallur në kërkim pasi ushtroi dhunë fizike ndaj babait të tij është arrestuar nga policia.
Ndërkohë është plotësuar kërkesë-padia për urdhrin e mbrojtjes për dy nuset, 31 vjeçe dhe 28 vjeçe pasi vjehrri i tyre ushtronte dhunë psikologjike e fizike ndaj tyre. Mbetet e paqartë nëse reagimi i djalit ndaj të atit erdhi për shkak të dhunës që ky i fundit ushtronte ndaj dy grave.
“Specialistët për Hetimin e Krimeve në Komisariatin e Policisë Pogradec bënë ndalimin e shtetasit në kërkim E. M., 32 vjeç, banues në fshatin Buçimas, Pogradec. Ky shtetas, në datën 28.01.2021, dyshohet se në banesë ka ushtruar dhunë fizike ndaj babait të tij, shtetasit M. M., 64 vjeç.
Në lidhje me këtë rast u plotësua kërkesë-padia për lëshimin e menjëhershëm të urdhrit të mbrojtjes për shtetaset M. M., 31 vjeçe dhe E. M., 28 vjeçe, banuese në fshatin Buçimas, Pogradec, pasi shtetasi M. M. (vjehrri i tyre) ka ushtruar dhunë psikologjike dhe fizike ndaj tyre”, njofton policia.
Ndërkohë, është arrestuar dhe një 59-vjeçar pasi goditi me grushte në kokë një 47-vjeçar dhe më pas kundërshtoi me dhunë punonjësit e policisë.
“Gjithashtu, nga të njëjtat struktura u bë arrestimi në flagrancë i shtetasit L. T., 59 vjeç, banues në Pogradec (i dënuar më parë për veprën penale “Goditje për shkak të detyrës”).
Ky shtetas, mbrëmjen e djeshme, në lagjen nr. 1, Pogradec, për motive të dobëta, ka goditur me grushte në kokë shtetasin M. M., 47 vjeç, banues në Pogradec, dhe gjatë shoqërimit për në ambientet e Komisariatit ka kundërshtuar me dhunë punonjësit e Policisë.
Materialet i kaluan Prokurorisë pranë Gjykatës së Shkallës së Parë Pogradec, për veprat penale “Dhuna në familje”, “Plagosja e lehtë me dashje” dhe “Kundërshtimi i punonjësit të policisë së rendit publik”.” – njofton policia.
