Në takimin e kaluar me 4 prill, i dërguari evropian për bisedimet Kosovë-Serbi, Miroslav Lajçak, tha se “janë mbushur disa boshllëqe midis propozimeve të të dyja palëve dhe se do të vazhdojnë diskutimet bazuar në idetë e Bashkimit Evropian për kompromis”, ndonëse nuk dha hollësi se cili është “kompromisi” i propozuar.

Kryenegociatori i Serbisë, Petar Petkoviç, tha se Beogradi “bëri gjithçka për të gjetur një zgjidhje”, ndërsa akuzoi Prishtinën për dështimin e raundit të sotëm të bisedimeve.

“Ne dolëm me një propozim konstruktiv dhe ai propozim u vlerësua nga Brukseli, si një bazë shumë e mirë për vazhdimin e bisedimeve”, tha ai, duke theksuar se Prishtina erdhi në Bruksel pa komentuar idetë e Bashkimit Evrppian dhe kjo tregon qartë se pala tjetër nuk dëshiron të pajtohet për asgjë”.

Por, kryenegociatori i Kosovës, Besnik Bislimi tha se qasja e palës serbe pamundësoi suksesin e bisedimeve.

“Ata në takim sot në mënyrë perfekte treguan kotësinë dhe mosvërtetësinë e konstatimeve të tyre të mëhershme se kemi një çështje urgjente ku disa qytetarë serb të moshës së shtyre nuk kanë arritur të marrin benefitet e tyre. Njësoj sikur herët e kaluara, ka pasur zero interesim nga pala serbe që të merren me këta qytetarë, e gjithë energjia e tyre sërish është orientuar drejt licencimit të një subjekti ekonomik të Serbisë në Kosovë, gjë që për neve është e papranueshme dhe e kemi bërë të qartë në vazhdimësi”, tha zoti Bislimi.

Një rregullore e Bankës Qendrore të Kosovës, e cila hyri në fuqi me 1 shkurt, përcakton se euroja është valuta e vetme që mund të përdoret për pagesa të gatshme në Kosovë.

Rregullorja nxiti reagimin e zemëruar të Beogradit, dhe shqetësimet e diplomacisë perëndimore për ndikimin e saj në jetën e serbëve të Kosovës që vazhdojnë të mbështeten financiarisht nga Beogradi.

Diplomatët i kanë bërë thirrje qeverisë së Kosovës të pezullojë rregulloren dhe t’u jepet kohë qytetarëve të prekur për t’u përshtatur me situatën e re. Kjo çështje është shndërruar në temë mospajtimesh mes qeverisë në Prishtinë dhe diplomacisë perëndimore./ VOA

Ambasadori i Shteteve të Bashkuara të Amerikës Jeffrey Hovenier, ka zhvilluar një takim me presidenten e Kosovës Vjosa Osmani.

Temë e diskutimit ishte edhe ndalimit të qindra qytetarëve kosovarë nga Serbia, në kufirin me Kroacinë përfshirë këtu edhe mbajtjen e zëvendësdrejtorit të policisë së Kosovës, Dejan Jankoviç.

Hovenier u shpreh shumë i shqetësuar lidhur me këtë fakt.

“Jam shumë i shqetësuar, veçanërisht për dikë që e njohim prej disa vitesh, i cili ka ndihmuar shumë në integrimin e komunitetit serb në Policinë e Kosovës dhe ruajtjen e trashëgimisë kulturore të Kosovës”, tha Hovenier para mediave.

Ai tha se pajtohen me deklaratën e djeshme të Bashkimit Europian ku tha se Serbia ka shkelë marrëveshjen për liri të lëvizjes me ndalimin e qytetarëve të Kosovës në pikat kufitare.

“Ishte një deklaratë nga BE dje. Ne punojmë për të mbështetur BE-në në negociatat e dialogut..zotëri Stano e bëri shumë të qartë këtë dhe ne nuk kemi si të mos dakordohemi se si BE i sheh këto gjëra. SHBA kërkon që të gjitha marrëveshjet e arritura në dialog të implementohen plotësisht dhe ne vazhdojmë të punojmë së bashku”.

Gjatë së mërkurës shumë qytetarë nga Kosova u bllokuan nga Serbia në pikën kufitare me Kroacinë. Pos kësaj 10 zyrtarë policorë, përfshirë edhe zëvendësdrejtorin e policisë Dejan Jankoviç u ndaluan nga autoritetet serbe.

Dje pesë nga ta u liruan, ndërkaq sot u liruan edhe katër të tjerë, ndërkaq Jankoviç po mbahet ende nga Serbia.

Opozitari serb, Nikolla Sandulovic, ka thënë se ai e ka paralajmëruar Bashkimin Evropian dhe Shtetet e Bashkuara të Amerikës për politikën që  përdorë presidenti i Serbisë, Aleksander Vuçic.

Në platformën X, ai ka theksuar se ai Vuçic ka një politikë nacionaliste, kjo pasi qindra kosovarë nuk u lejuan dje të kalojnë kufirin Kroaci-Serbi dhe Hungari-Serbi me letërnjoftime.

“Unë kam vite që flas dhe paralajmëroj se cila është politika e Aleksandër Vuçiqit dhe cili është qëllimi i tij përfundimtar. Të gjithë në BE dhe SHBA ranë në gjumë për shkak të negociatave të tij afatgjata dhe gënjeshtrave që i tha ai publikut ndërkombëtar, ndërsa në të njëjtën kohë ndoqi politikën e tij të vjetër nacionaliste në Serbi” – tregoi opozitari serb.

“E kam thënë atëherë, e them edhe tani, vetëm Partia Republikane në Serbi mund të sjellë paqe të qëndrueshme dhe zgjidhje të plotë për Serbinë dhe Kosovën. Diçka e tillë, të cilën Vuçic po e zbaton, çon vetëm në konflikt dhe katastrofë të pashmangshme” – ka potencuar Sanduloviç.

Kandidati për kryeminister në qeverinë e re që do të krijohet në Serbi,  Millosh Vuçeviç, ka thënë se vendimi pozitiv i Asamblesë Parlamentare të Këshillit të Evropës për anëtarësimin e Kosovës në atë organizatë është një gozhdë tjetër në arkivolin e së drejtës publike ndërkombëtare, dhe gjithashtu ka theksuar se Serbia është në të njëjtin vend ku historikisht ka qenë gjithmonë.

“Serbia dje dhe sot, besoj edhe nesër, mund të shikojë këdo në sy sepse nuk i shkakton dëm e as dhimbje askujt dhe mbi të gjitha nuk cenon parimet bazë të së drejtës ndërkombëtare, apo rregullat dhe parimet bazë. Ajo që pamë në Strasburg është vazhdimësia e një festivali hipokrizie dhe një tjetër gozhdë në arkivolin e ligjit ndërkombëtar dhe të gjitha standardeve që duhet të zbatohen” – deklaroi Vuçeviç, duke shtuar se nuk bëhet fjalë vetëm për votim në Asamblenë Parlamentare të Këshillit të Evropës.

“Është edhe më keq kur dëgjon justifikimet e tyre. Sa mirë është kur rrëmben një pjesë të territorit të një vendi. Nuk ka rëndësi nëse kryhet sot terror mbi popullin e atij vendi. Rregullat dhe parimet e vendosura nga Këshilli i Evropës nuk plotësohen. Kosova nuk po respekton marreveshjet e arritura. Kanë kaluar më shumë se 4000 ditë nga premtimi për krijimin e asociacionit, pork jo nuk ka rendesi për Perëndimin” – theskoi ish ministri serb I mbrojtjes

Ai gjithashtu potencoi se nuk është fjala për “perceptimin serb të Kosovës, të cilin ne e perceptojmë si pjesë përbërëse, të patjetërsueshme të vendit tonë, djep të shpirtërores dhe identitetit tonë, por është edhe fakti se kanë shkelur atë që kanë vendosur vetë sepse dikush i ka keshilluar me telefon apo me email.

“Që e ashtuquajtura Kosova dhe shqiptarët duhet të kenë një shans të ri dhe të shpërblehen. Ata ndoshta duhet të shpërblehen për arrestimin e shumë serbëve. Askujt nuk i intereson, serbët nuk konsiderohen fare se janë viktima dhe nuk ka asnjë ligj ndërkombëtar public që I mbron” – deklaroi Vuçeviç.

Sipas tij, Serbia do të luftojë me argumente, me fakte, me ligj, me moral dhe me vetëbesim.

“Nëse ne nuk besojmë në veten tonë, nuk do të na besojnë edhe të tjerët. Përsa i përket fazës finale të procesit të anëtarësimit te Kosovës, nuk ka shumë vend për manovrim, por nuk ka as dorëzim. Ne do të luftojmë kundet të gjithë atyre që shkelin të drejtën ndërkombëtare publike dhe shkelin normat themelore morale.“ – potencoi kandidati per kryeminister ne qeverine e re serbe

Kryeministri i Spanjës, Pedro Sánchez – një nga kritikët më të zëshëm të ofensivës së Izraelit në Gaza – paralajmëroi javën e kaluar se do të lëvizë drejt njohjes së shtetësisë palestineze para korrikut, por qëndrimi i eksekutivit spanjoll rreth Palestinës pritet të dobësojë argumentin tradicional refuzues të politikës së jashtme të Spanjës rreth pavarësisë së Kosovës.

Alejandro Esteso Perez, njohës i zhvillimeve politike dhe marrëdhënieve ndërkombëtare, konsideron se ambicia proaktive e qeverisë spanjolle për të njohur Palestinën bien ndesh me qëndrimin e ashpër të Spanjës ndaj Kosovës, duke qenë se Spanja vazhdon të jetë e mbyllur gati hermetikisht për çfarëdo bashkëpunimi.

Politologu dhe studiuesi spanjoll, Guillem Purlas, në një artikull të fundit të publikuar në gazetën spanjolle “El Independiente” mbi paralajmërimin e Spanjës për njohjen e shtetit të Palestinës, vlerëson se nëse Spanja avancon drejt njohjes së shtetit të Palestinës, duhet të avancojë edhe drejt njohjes së Kosovës – nuk ekziston asnjë logjikë tjetër pas pozicionit spanjoll.

Perez konsideron se Spanja mund të përdorë përkushtimin e vazhdueshëm ndaj Palestinës për të përshtatur pozicionin ndaj Kosovës, duke qenë se populli spanjoll përgjatë historisë ka mbështetur parimin e vetëvendosjes së popujve, por kjo nuk nënkupton që Kosova të medoemos shfrytëzojë realitetet e reja gjeopolitike në botë për të marrë njohjen nga Spanja.

Spanja nuk e njeh pavarësinë dhe sovranitetin e Kosovës për shkak të lëvizjeve secesioniste brenda territorit të vet. Logjika është shumë e thjeshtë – nëse Madridi pranon se Prishtina ka të drejtën e pavarësisë kombëtare, atëherë standardi i njejtë duhet të aplikohet edhe në rastin e Katalonjës dhe Baskisë – rajone që prej kohësh synojnë shkëputjen nga Spanja.

Por Franca e njeh Kosovën duke pasur Korsikën; Italia përballet gjithashtu me secesionizmin e Tirolit të Jugut, madje edhe Turqia e njohu Kosovën duke pasur secesionizmin kurd, ndërsa Mbretëria e Bashkuar duke pasur secesionizmin skocez”.

E pavarësisht këtyre modeleve në territorin evropian, shteti spanjoll vazhdimisht etiketon hapin unilateral të Kosovës si shkelje të së drejtës ndërkombëtare, ndonëse perëndimi kolektiv përsërit se njohja e Kosovës përbën një rast sui generis lidhur me normën e tërësisë territoriale dhe nuk mund të shihet si një precedent për ndonjë situatë tjetër në botën e sotme.