Për të qenë sot pjesë e tregut të punës, profesionistëve natyrisht që ju duhen kualifikime përtej asaj çfarë marrin në auditorët e shkollave.
Vazhdimi i studimeve master sot është një kriteret kryesore që nesër të kesh një pozicion të mirë pune, aq më tepër kur këto programe ofrohen nga universitete që janë të njohura në të gjithë botën.
Edhe pse jemi në një vit pandemie, ku duket se gjithçka është e fokusuar tek shëndeti, arsimi mbetet prioritet. Muaji mars duket se do të ofrojë shumë mundësi për profesionistët e rinj në Shqipëri që duan të ndjekin kualifikimet master në degë të ndryshme, në disa prej universiteteve më të njohura të Shteteve të Bashkuara të Amerikës.
Edhe këtë vit, Fondacioni Shqiptaro-Amerikan për Zhvillim (AADF) ka hapur aplikimet për Programin e Bursave për Studime Master në SHBA.
Një program që do t’u ofrojë profesionistëve kualifikime në nivel masteri në degë të ndryshme, si në ato të : Agrikulturës, Menaxhimit dhe Administrim Biznesit, Kulturë, Eko-Turizëm, Edukimi, Teknologji Informacioni dhe Shkenca Kompjuterike, Politika Publike, Administrimi Publik, Shëndet Publik dhe Drejtësi.
Menaxherja e projekt, Elona Xhaferri ishte e ftuar sot në “Wake Up”, ku tregoi më shumë detaje rreth këtij projekti.
“Ky projekt ka filluar në vitin 2016. Ne aktualisht kemi 25 ‘fellow’ siç i quajmë, të rinj që janë duke kryer studimet në SHBA. Kemi hapur thirrjen për studentët që mund të ndjekin studimet në vitin 2021. Aktualisht thirrja është ende e hapur dhe afati i aplikimit është deri në datë 31 mars.
Mund të themi që interesi ka qenë shumë i madh. Ne mesatarisht, çdo vit marrim 100- 200 aplikime dhe procesi i përzgjedhjes është mjaft i detajuar, mjaft transparent dhe i gjatë. Pothuajse zgjat 1 vit, nga momenti i aplikimit, përzgjedhjes, deri në pranimin në Universitetet në Amerikë.
Procesi i seleksionimit fillon në muajin prill, pasi deri më 31 mars është afati i fundit i aplikimit, deri në muajin nëntor.
Në nëntor kemi listën finale të kandidatëve të përzgjedhur. Ata më pas nisin procesin për aplikimin në universitetin në Amerikë. Ne bëjmë sugjerimet tonë për Universitetet, pasi ata nuk mund t’i njohin mirë”, sqaroi ajo.
gsh/
