Ditët e fundit shifrat e të infektuarve me koronavirus po rriten dhe situata mund të dalë jashtë kontrollit.
Ndërkohë, disa qytetarë janë akoma skeptikë për ekzistencën e virusit ose për rrezikshmërinë e tij dhe i neglizhojnë këshillat e ekspertëve.
Në botë janë bërë edhe studime lidhur me kundërshtimin e maskës dhe këtë gjë e cilësojnë si një çrregullim të personalitetit anti-social.
Psikologia e njohur klinike, Jorida Rustemi ishte e ftuar sot në “Wake Up”, ku theksoi se edhe pse rreziku ndaj virusit është i madh, njerëzit hezitojnë të mbajnë maskën.
“Për arsye të ndryshme, njerëzit e kanë të vështirë të respektojnë masat dhe gjëja shkon deri diku në variantin e paketës. Nëse toleron diçka, nëse nuk e ke zbatuar rregullin diku, vijon të mos e zbatosh atë.
Është efekt zinxhirë. Gjatë kohës së karantinës ne ishim më të bindur, u punua që të bindeshim më shumë për të zbatuar rregullat dhe njerëzit ishin më shumë bashkëpunues. Kjo, pasi situata ishte e panjohur, gjithçka ndryshonte me ditë”, tha ajo.
Më tej, Rustemi shtoi: “Aktualisht që flasim, një pjesë e konsiderueshme e njerëzve e kanë kaluar Covid, po e kalojnë ose minimalisht njohin një person që e ka kaluar. Ka disa që kanë pasur disa humbje brenda familjes.
Situata tek ne ka qenë deri diku e paqëndrueshme dhe e paqartë te njerëzit. Unë ndaj qëndrimin shumë të fortë se shkollat janë ndër arsyet kryesore që ndikojnë në përhapjen e virusit, sepse sado kujdes të bëjë një person, nëse ka një fëmijë në shkollë, edhe me masat që mund të merren, probabiliteti që fëmija të mund të ruhet prej natyrës së tij, është i vogël.
Fëmijët do të jenë përcjellës të infeksionit në familje. Në fakt ne kemi pasoja, kemi 6 fëmijë që kanë humbur jetën nga Covid”.
