Qeveria e re e Malit të Zi, e cila përbëhet në pjesën më të madhe nga pjesëtarë të nacionalitetit serb ka vendosur që të fusë në vend vaksinën kineze ndaj Covid 10
Këtë e ka bërë të ditur vetë ministrja e Shëndetësisë së Malit të Zi, Jelena Boroviniç Bojoviç, pas takimit me përfaqësues të kompanisë kineze “Sinofarm”.
Lajmin, Bojoviç e dha në adresën e saj të twitter-it, ku thekson se sasia e parë e vaksinës kineze do të vijë në fund të janarit.
Ministrja në postimin e saj falënderoi partnerët kinezë për “shpejtësinë dhe kujdesin që ata treguan gjatë negociatave intensive në periudhën e mëparshme, e cila rezultoi në marrëveshjen përfundimtare për shpërndarjen e sasive të respektuara të vaksinave në Malin e Zi sa më shpejt të jetë e mundur, të cilat do të jenë në dispozicion të qytetarëve malazezë”.
Ministria shton se është në fazën e fundit të negociatave bilaterale me prodhues të tjerë të vaksinave anti-Covid.
“Mali i Zi vazhdon dialogun brenda iniciativës Covax, në mënyrë që qytetarët malazezë të kenë në dispozicion sasi të mjaftueshme të vaksinave në mënyrë që imunizimi kundër infeksionit Sars-Cov2 të jetë në një nivel të lartë”, theksohet në deklaratën e publikuar nga ministrja e Shëndetësisë së Malit të Zi në rrjetet sociale.
