Shqipëri / Festivali Mbarëkombëtar i Teatrit Online

“Festivali Mbarëkombëtar i Teatrit Online” do të ketë këtë vit shfaqje nga institucionet teatrore, por dhe nga projekte të skenës së pavarur. Dy institucione teatrore në vend, Teatri Kombëtar dhe Teatri Kombëtar Eksperimental “Kujtim Spahivogli” po bashkëpunojnë mes tyre për të sjell këtë vit festivalin, por në formatin online për shkak të situatës me pandeminë. Në një njoftim nga institucionet thuhet se ky festival është i hapur për të gjithë teatrot e trevave shqipfolëse. “Ftojmë të gjithë teatrot zyrtarë dhe skenën e pavarur të bëhen pjesë e “Festivalit Mbarëkombëtar Online” dhe ti bashkohet thirrjes tonë: “Teatri vazhdon”. Të gjitha shfaqjet do të transmetohen livestreaming në Facebook-un e Teatrit Kombëtar dhe në Facebook-un e teatrove pjesëmarrëse, duke filluar prej datës 23 shkurt”, thuhet në njoftimin për festivalin, që pritet të zhvillohet. Të dy institucionet teatrore bëjnë me dije se ftojnë që të dërgohet shfaqje e regjistruar për ata që do të përfaqësohen në festival, sipas kritereve që janë vendosur. Për “Festivalin Mbarëkombëtar të Teatrit Online” që këtë vit do të zhvillohet për herë të parë mes kritereve thuhet se shfaqja dhe muzika duhet të kenë të drejtën e autorit. “Shfaqja të jetë e regjistruar në mënyrë profesionale (zëri të jetë i qartë dhe i dëgjueshëm, të jenë 2 ose më shumë plane të shfaqjes). Shfaqja dhe muzika të kenë të drejtën e autorit në të kundërt Facebook do ta bllokojë transmetimin për shkelje. Ju lutemi të na dërgoni kërkesën tuaj për të marrë pjesë në festival në adresën: [email protected] dhe numrin e kontaktit të personit që do merret me anën teknike e dërgimit të shfaqjes elektronikisht”, bëhet me dije për përfaqësimin në këtë festival teatri online. Skena e pavarur ka afat deri në datë 29 janar ora 12:00, për të dërguar shfaqjen me të cilën do përfaqësohet në “Festivalin Mbarëkombëtar të Teatrit Online”. / Nga Julia Vrapi