Aktualitet
Si një biznes kriminal është shndërruar në biznes social
Në një adresë të errët të Durrësit, deri para pak kohësh pronë në duar të krimit të organizuar, sot të rinjtë e këtij qyteti zhvillojnë veprimtari të dobishme.
Me kënaqësi pashë se aty tashmë lexohet Kadare, Buzzati, Orwell, mësohen gjuhë të huaja, matematika, fizika, etj.. Tek kjo qendër e thjeshtë mund të shihet se si një biznes kriminal është shndërruar në biznes social. Tek kjo qendër mund të shihet edhe vizioni se si duhet luftuar krimi i organizuar, duke e vënë pasurinë e tij në shërbim të publikut.
OFL dhe agjenci të tjera të zbatimit të ligjit e kanë shumëfishuar vëllimin e pasurive kriminale të sekuestruara apo të konfiskuara. Agjencia përgjegjëse për administrimin e tyre është tashmë përpara sfidës për zgjidhje origjinale, me qëllim që përmes menaxhimit të përshtatshëm të jepen mesazhet e duhura ndaj krimit. Rruga kriminale është pa krye, pasuritë që rezultojnë prej saj nuk kanë të ardhme.
Në bashkëpunim me institucionet e tjera dhe me partnerët ndërkombëtarë, agjencia e administrimit do të sigurojë që pasuritë e krimit të organizuar të shkojnë në dobi të Policisë së Shtetit, SPAK, aktorëve të shoqërisë civile, viktimave të krimit dhe posaçërisht familjeve të policëve të rënë në krye të detyrës.