Sot në Ministrinë e Drejtësisë mblodhëm Koordinatorët e Rrjetit Antikorrupsion, të cilëve u kërkova rezultate të menjëhershme dhe profesionalizëm maksimal në ushtrimin e kësaj detyre kaq të rëndësishme.
Rrjeti Antikorrupsion është një strukturë për të cilën kemi pritshmëri shumë të mëdha dhe këto pritshmëri duhet të realizohen nga koordinatorët, në bazë të rezultateve që sjellin.
Koordinatorë Antikorrupsion kanë filluar punën në institucionet përkatëse dhe duhet ta kuptojnë rëndësinë jetike të këtij roli, sepse nuk është thjesht një pritshmëri që kanë njerëzit, nuk është thjesht një pritshmëri që kanë aktorët ndërkombëtarë, por është një pritshmëri që lidhet me pjesën e rezultateve që të gjithë qytetarët presin.
Puna e këtij rrjeti duhet nxitur dhe promovuar fort me qëllim që qytetarët ta dinë ekzaktësisht që Rrjeti Antikorrupsion ka filluar funksionimin. Kjo ka shumë rëndësi pasi do të jenë qytetarët ata që do të sjellin denoncimet apo ankesat për korrupsionin apo shpërdorimin e detyrës, pasi shpeshherë është e vështirë edhe ndarja me thikë e këtyre dy elementëve.
Nëse do të ketë sjellje, qasje që nuk i shkojnë përshtat koordinatorit antikorrupsion, paralajmërova se do të marr vendimin që të largoj koordinatorin nga rrjeti. Nuk mundet që të vëmë në rrezik rrjetin për një koordinator që nuk do të arrijë të ushtrojë funksionin dhe të ketë sjellje apo qasje që nuk duhet të ketë një koordinator antikorrupsion. Dhe këtu besoj se mesazhi është i qartë.
U garantova Koordinatorëve Antikorrupsion se në këtë rrugëtim për të mirën e qytetarëve të Shqipërisë, ata nuk janë vetëm, por kanë të gjithë mbështetjen time, të Qeverisë dhe të Kryeministrit Rama, pasi koha nuk pret dhe rezultatet e luftës kundër korrupsionit janë jetike për vendin.
