Autoritetet serbe kanë kryer një super-aksion për goditjen e një grupi të fuqishëm kriminal, që nisi mbrëmjen e djeshme dhe përfundoi me 16 të arrestuar, mes të cilëve ‘kapoja’ i tifozëve të Partizanit të Beogradit, Velja Nevolja, i akuzuar për vrasjen e Zdravka Radojevica, tifoz i rivalëve të Crvena Zvezda.
Mediat serbe shkruajnë se ky është operacioni më i madh i 10 viteve të fundit, ku është goditur një ndër bandat më famëkeqe, që ka kryer krime monstruoze.
Zëvendës shefi i drejtorisë së policisë kriminale, Ninoslav Cmoli, tha se operacioni i mëngjesit të sotëm për arrestimin e një grupi të organizuar kriminal, i cili fshihej pas grupit të tifozëve të Partizanit, tregoi se nuk ka njerëz të mbrojtur në vend dhe se asnjë organizatë kriminale nuk do të tolerohet.
“Grupi kriminal që u shkatërrua këtë mëngjes është përgjegjës për një seri krimesh më monstruoze, mbase në dekadat e fundit. Ky grup ka qenë gjithmonë i fshehur pas tifozëve të Partizanit, por ata nuk janë tifozë, por kriminelë. Nuk do të tolerojmë asnjë”, tha Cmoli.
Nga ana e tij, Presidenti i Serbisë, Aleksandar Vuçiç, vlerësoi bashkëpunimin midis Ministrisë së Brendshme dhe Prokurorisë për Krimin e Organizuar duke e cilësuar “një goditje të madhe për mafien”.
“Kjo është një goditje e madhe për mafian dhe krimin e organizuar”, tha Vuçiç. “Jam i lumtur që policia dhe ministri bënë një punë të mirë dhe besoj dhe shpresoj që kjo luftë të vazhdojë”, shtoi ai. GSH/
