Kosova
Tensionet Kosovë-Serbi/ “Kurti vazhdimisht po e ndihmon Vuçiçin”
Situata Kosovë-Serbi ka acaruar Shtetet e Bashkuara dhe Bashkimin Evropian, të cilët prej kohësh janë përpjekur të ulin tensionet dhe të ndërmjetësojnë një zgjidhje për Kosovën, thuhet në një shkrim të New York Post.
Ata dënuan me terma jashtëzakonisht të ashpër dislokimin e forcave të sigurisë në veri të Kosovës nga z. Kurti, kryeministri kosovar.
“Tensionet në Kosovë “vetëm e ndihmojnë Vuçiçin” duke ndezur pasionet për territorin që shumica e serbëve e shohin si pjesë të vendit të tyre”, tha Milomir Mandic, menaxheri i përgjithshëm i Demostat.
“Kurti po e ndihmon vazhdimisht Vuçiçin”, tha Pavle Grbovic, një deputet i opozitës në parlamentin serb nga Lëvizja Qytetarët e Lirë, e cila ka ndihmuar në organizimin e protestave javore në rrugë në Beograd.
“Askush në skenën politike serbe nuk ka bërë më shumë për pozitën e Serbisë në Kosovë dhe për zotin Vuçiç se z. Kurti”, tha ai.
Ndërkohë që diplomatët e lartë amerikanë dhe evropianë janë zemëruar për atë që ata e shohin si provokim nga Kosova, Serbia është kënaqur që po trajtohet si një partner i rëndësishëm.
Gjenerali Daniel R. Hokanson, një anëtar i Shefave të Përbashkët të Shtabit, vizitoi Beogradin këtë javë dhe përshëndeti atë që ai e përshkroi si një “partneritet vërtet fantastik” me Serbinë.
Lavdërimi i tij është pjesë e përpjekjeve amerikane për ta larguar Serbinë nga Rusia dhe drejt Bashkimit Evropian. Ka pak shenja se blloku evropian është i interesuar të ringjallë kërkesën e ngecur prej kohësh të Serbisë për t’u bashkuar dhe Serbia ka refuzuar të vendosë sanksione ndaj Rusisë për luftën në Ukrainë, ka shkruar ndër të tjera New York Post.