Pavarësisht kërkesës së studentëve që të rikthehen në auditorë për të zhvilluar mësimin, apo edhe provimet duke qenë se tani kanë hyrë në muajin që nis sezoni, Komiteti Teknik i Ekspertëve ende nuk ka dalë me një vendim përfundimtar.
Vetë universitetet kanë marrë vendimet për sezonin e provimeve. Universiteti i Tiranës në datën 1 shkurt ka dalë me një vendim, ku ka vendosur që provimet e semestrit të parë të zhvillohen online.
Në vendim thuhet gjithashtu se lëndët specifike, për të cilat studentët nuk japin dot provim online, do të vendosë Komiteti Teknik i Ekspertëve nëse ato do të mund të kryhen në auditorë. Në të kundërt do të jenë vetë titullarët e lëndës ata që do të vendosin ose për një shtyrje të provimeve në semestrin tjetër ( brenda qershorit), ose për një formë tjetër alternative.
Raportohet se studentë të fakultetit ekonomik në Universitetin e Tiranës pas marrjes së vendimit që provimet do të zhvillohen online, kanë vendosur që t’i bojkotojnë ato nëse nuk do të gjendet një zgjidhje.
Gentiana Lala, studente e vitit të 2-të dega Financë në Fakultetin Ekonomik bëri të ditur në “Wake Up” se kanë dorëzuar një peticion me 10 mijë firma, ku kërkojnë rikthimin në auditorë.
“Për sa i përket vendimmarrjes që rektorati i Universitetit të Tiranës ka publikuar na datën 1 shkurt, në gjykimin tim është një vendimmarrje totalisht inefiçiente për të gjithë studentët. Tashmë është dorëzuar një peticion me mbi 10 mijë firma pranë Komitetit Teknik dhe instancave përkatëse për rihapjen e auditorëve.
Arsyet pse unë mendoj që do jetë një dështim total janë: së pari, mbi 40% e studentëve nuk kanë pasur akses në mësimin online. E dyta, e dimë shumë mirë që në zona të ndryshme të Shqipërisë nuk ka linjë telefonike jo më internet. Edhe në Tiranë ikin dritat dhe nëse kjo ndodh gjatë provimit, studenti skualifikohet”, tha Gentiana.
gsh/
