Përmes një postimi në rrjetin social Twitter, Komisioneri për Zgjerimin, Oliver Varhelyi, tha se Bashkimi Europian qëndron krah partnerëve në Ballkanin Perëndimor në luftën kundër covid-19.
Varhelyi pohon se në takimin e Këshillit Europian kishte theksuar nevojën për t’i mundësuar qasje më të shpejtë ndaj vaksinës, vendeve të rajonit.
Mënyra e shpërndarjes së vaksinave është kritikuar edhe nga kryeministri Edi Rama, në disa raste. Për këtë reagim ambasada franceze dërgoi një notë proteste, ndërsa ambasadori i Bashkimit Europian në Tiranë, Luigi Soreca, u shpreh i habitur.
Ndërkohë, Shqipëria e ka nisur procesin e vaksinimit me disa qindra doza, të cilat u janë administruar mjekëve dhe personelit shëndetësor në spitalet Covid. Ndërkohë, në javët dhe muajt në vazhdim priten doza të tjera. Rama deklaroi në 1 janar se ka nënshkruar një marrëveshje me Pfizer për 500 mijë doza, ndërsa vendi gjithashtu është pjesë e nismës Covax për sigurimin e dozave të mjaftueshme për vaksinim masiv.
