Vonesat në shpërndarjen e vaksinave nga kompanitë farmaceutike në BE, ka “detyruar” unionin të kërcënojë me shtëngim të masave për eksportimin e vaksinave antiCOVID, të prodhuara në një nga vendet anëtare jashtë Bashkimit Evropian.
Lajmi u bë publik nga komisionerja Stella Kyriakides, pas lajmërimit nga kompania britaniko-suedeze AstraZeneca, se do të vonojë për disa javë furnizimet me vaksinat e saj, për shkak të shkallës së prodhimit dhe shpërndarjes së saj deri tani.
Ajo tha se kompania synon t’i furnizojë vendet e kontraktuara me “disa doza më pak” se sa qe dakordësuar më parë, duke theksuar se një gjë e tillë është e papranueshme pasi BE kishte para-paguar zhvillimin e vaksinës dhe prodhimin e saj.
Madje ajo ka shkuar më tutje duke kërkuar transparencë rreth eksporteve të vaksinave dhe ka kërkuar paraprake për çdo sasi vaksinash që do t’u japin vendeve të treta.
“Ngarkesat humanitare nuk do të preken,” – siguroi Kyriakides.
BE ka siguruar rreth 2.3 miliardë doza vaksinash përmes disa para-marrëveshjeve të nënshkruara me gjashtë kompani farmaceutike, përfshirë këtu 300 milionë doza nga AstraZeneca. Megjithatë AstraZeneca-s nuk ka marrë ende miratimin nga Agjencia Evropiane e Barnave (EMA), e cila ka në plan për ta shqyrtuar këtë gjë më 29 janar. BE nisi fushatën e vaksinimit në muajin dhjetor dhe deri më tani i ka besuar kryesisht vaksinave të prodhuara nga Pfizer/BioNtech dhe Moderna. Që nga data e fillimit të vaksinimit në BE më pak se 8.5 milionë persona nga 450 milionë banorë që ka blloku kanë marrë njërën dozë të vaksinës, duke ngjallur kritika të shumta për shpejtësinë e procesit.
Deklaratat e komisioneres nuk dihet ende si do të ndikojnë në shpërndarjen e vaksinave në vendet jashtë unionit, të cilët kanë kritikuar vazhdimisht BE-në për mungesë solidariteti. Në veçanti vendet e Ballkanit perëndimor kanë akuzuar bllokun, ku vetëm Shqipëria dhe Serbia kanë arritur të nisin vaksinimin.
