11/06/2021 , 18:41

Votimi historik – Me 175 vota pro, Shqipëria anëtare e Këshillit të Sigurimit në OKB

Shqipëria zgjidhet anëtare jo e përhershme e Këshillit të Sigurimit duke siguruar votën pro të 175 vendeve nga 190 vende që votuan në total, ndërsa 14 abstenuan.

Muhamed Veliu: Zonja ministre, sapo keni përfunduar një takim me Sekretarin e Përgjithshëm OKB-së. Çfarë diskutuat dhe sa shanse ka, që Shqipëria të votohet si anëtare me të drejta jo të plota në Këshillin e Sigurimin këtë të premte?

Olta Xhaçka: Patëm një takim shumë të mirë me Sekretarin e Përgjithshëm të OKB-së. kemi pasur si shtet, një marrëdhënie shumë të mirë me të, përgjatë mandatit të parë. Është duke u rizgjedhur në një mandate të dytë, për të cilin jemi të bindur ta thellojmë bashkëpunimin tonë. Edhe ai më garantoi se bashkëpunimi me Shqipërinë do të vazhdojë.

Muhamed Veliu: Si po shkon lobimi? Deri të premten, kur do të votohet nëse Shqipëria do ta marrë statusin e anëtarin me të drejta jo të plota, nuk ka dhe shumë kohë?

Olta Xhaçka: Në fakt, lobimi ka nisur shumë më herët. Padiskutim që kemi një agjendë shumë ambicioze, jemi shumë të qartë, jemi me këmbë në tokë sa i takon kufizimeve që ka një vend i vogël, në një tryezë kaq të lartë, të vendimmarrjes globale.

Po nuk na pengon për të qenë ambicioz për të avancuar një agjendë në dobi të interesave kombëtare, në dobi të çështjeve rajonale, por edhe të atyre që janë prioritetet tona që në fakt vijnë nga eksperienca më e mirë e Shqipërisë. Për Shqipërinë vlen të thuhet që është një mundësi e jashtëzakonshme, patjetër prestigj për politikën e jashtme dhe për diplomacinë e saj por edhe një mundësi e jashtëzakonshme për të thelluar bashkëpunimin me partnerët dhe aleatët me të cilët ndajmë vlera dhe parime të njëjta, por edhe për të zgjeruar aktivitetin diplomatik të Shqipërisë përtej atyre kufijve që kemi pasur deri më sot, sigurisht të diktuara nga një agjendë që është shumë e madhe për të thënë globale sa i takon paqes dhe sigurisë në Këshillin e sigurimit.

Muhamed Veliu: Një vend uljeje në Këshillin e Sigurimit, po për Kosovën si përkthehet?

Olta Xhaçka: Kosova patjetër që është çështje e interesit tonë kombëtar dhe patjetër që do të kemi një mundësi shumë të mirë përmes të qenurit në Këshillin e sigurimit për ta risjellë Kosovën në vëmendjen e komunitetit ndërkombëtar, të këshillit të sigurimit të Kombeve të Bashkuara. Patjetër vlen të thuhet që jemi shumë të ndërgjegjshëm për kufizimet që kemi si një vend i vogël në këtë tryezë të madhe, por kjo nuk na pengon që të bëjmë maksimumin për të avancuar ato që janë çështje të interesit kombëtar, çështjet rajonale dhe patjetër ato të paqes dhe sigurisë edhe me gjerë se sa rajoni ynë përmes prioriteteve që i kemi vendosur vetes.

Këshilli i sigurimit përbehet 15 anëtarë prej të cilëve 5 pesë anëtarë të përhershëm SHBA, Franca, Mbretëria e bashkuar, Kina dhe Rusia me të drejtën e vetos. Shqipëria shkon në tryezën e këshillit të sigurimit si kandidaturë konsensuale e grupit të Europës lindore.

Çfarë është Këshilli i Sigurimit?

Këshilli i Sigurimit në OKB është ndër organet më të rëndësishme të Organizatës së Kombeve të Bashkuara, që ka për detyrë mirëmbajtjen e paqes dhe sigurisë në mes të kombeve. Vendimet e këtij organi quhen rezoluta dhe janë të obligueshme. Këshilli i Sigurimit ka pasur takimin e parë në janar 1946. KS mund të përdorë edhe forcën në konflikte të armatosura, por të gjitha shtetet permanente duhet të jenë dakord. Ka dy lloje shtetesh në Këshillin e Sigurimit: 5 shtete anëtare të përhershme dhe 10 shtete të zgjedhura. ShBA, Franca, Britania e Madhe, Kina dhe Rusia janë shtetet anëtare të përhershme.  10 shtetet e zgjedhura kanë ulëse në KS për një mandat 2-vjeçar. Një nga këto 10 shtete duhet të jetë nga Evropa Lindore, pjesë e së cilës është edhe Kosova dhe Shqipëria sipas OKB-së.

Shqipëria, Brazili, Gaboni, Gana dhe Emiratet e Bashkuara Arabe janë në garë, pa konkurrentë nga rajonet përkatëse, për 5 vendet. Por për t’u zgjedhur, secila prej tyre duhet të sigurojë dy të tretat e votave të vendeve anëtare të OKB-së. Votimi është i fshehtë. Shqipëria është vendi i vetëm që nuk ka qenë asnjëherë anëtare e Këshillit të Sigurimit.

Zakonisht shtetet e shpallin kandidaturën e tyre për Këshillin e Sigurimit vite më parë. Por ndodh që ka edhe vende që konkurrojnë në momentet e fundit. Këtë vit, Republika Demokratike e Kongos vendosi muajin e kaluar të vinte kandidaturën, duke vënë në dyshim anëtarësimin pothuajse të sigurtë për dy shtetet e tjera afrikane, Gabonin dhe Ganën. Megjithatë këtë javë, njoftimet nga Afrika vinin në dukje se Presidenti i Republikës Demokratike të Kongos, Felix Tshisekedi ka vendosur ta tërheqë kandidaturën. Këshilli i Sigurimit merret me paqen dhe sigurinë ndërkombëtare. Ai ka kompetenca të dërgojë paqeruajtës në rajone të trazuara, si dhe të miratojë sanksione.

 

Related Posts

Kategorite

BIoscalin