Kosova
Ka qenë një prej mbështetësve më të mëdhenj për pavarësinë e Kosovës
Ministri në detyrë për Evropën dhe Punët e Jashtme, Gent Cakaj, vlerësoi nëpërmjet një reagimi në Facebook, fjalën e mbajtur prej Kongresmenit Engel në dëgjesën e tij të fundit mbi Ballkanin.
“Kongresmeni Engel shpreh fare qartë, jo vetëm thirrjen që Serbia të pajtohet me realitetin e ri në Ballkan, duke njohur Republikën e Kosovës, por edhe absurditetin e plotë të pengimit të anëtarësimit në organizata ndërkombëtare.” -theksoi Cakaj në postim.
Për më shumë, Cakaj shprehet se derisa Engel është i qartë në rëndësinë e vënies së drejtësisë për këdo që ka kryer krime, ky i fundit po ashtu thekson se Serbia pothuajse s’ka bërë asgjë në ndëshkimin e krimeve të luftës, duke përmendur veçanërisht rastin e vëllezërve Bytyqi.
Sipas Kryediplomatit Cakaj, Kongresmeni Engel ka qenë një prej zërave më të vyer, mbështetësve më të mëdhenj dhe personave më të angazhuar për pavarësinë e Republikës së Kosovës, për tre dekada radhazi.
“Për këtë, ai meriton falënderime të pamata e mirënjohje të pafundme.”- përfundoi Cakaj reagimin e tij.
Ministria për Evropën dhe Punët e Jashtme