KTHETRAT E TRUMP/ BE të mbrojë Kosovën dhe Bosnjën nga paparishikueshmëria e presidentit të SHBA

Politika e Presidentit të Shteteve të Bashkuara të Amerikës, Donald Trump, ndaj Ballkanit Perëndimor është vështirë e parashikueshme, prandaj kjo nënvizon nevojën urgjente për liderët e Bashkimit Evropian të përgatiten për mundësinë e një agresioni potencal ruso-serb, i cili mund të çojë në destabilizimin e mëtejshëm të rajonit.

Alexander Rhotert, njohës i zhvillimeve në rajon, në një artikull autorial të botuar në gazetën gjermane “Tageszeitung” rreth tranzicionit politik në Uashington, ka ngritur dilemën se deri në çfarë mase SHBA-ja nën lidershipin e Trumpit do të vazhdojë të shohë rajonin si prioritet, në një kontekst të rënduar gjeopolitik.

Ai ka konsideruar se nën mandatin e dytë të Trumpit mund të rrezikohen Kosova dhe Bosnja, dy nga projektet më të rëndësishme të paqes të udhëhequra nga SHBA-ja pas Planit Marshall – një program i realizuar mes viteve 1948 dhe 1952 për rindërtimin e pjesës më të madhe të Evropës Perëndimore, pas Luftës së Dytë Botërore.

“Askush nuk mund të parashikojë politikën e Trumpit ndaj Ballkanin Perëndimor. Pikërisht për këtë arsye, BE-ja duhet të përgatitet për t’u mbrojtur nga agresioni ruso-serb… Pyetja mbetet nëse Trumpi do t’i rrezikojë dy projektet më të rëndësishme të paqes pas Planit Marshall – Bosnjën dhe Kosovën – duke ia ‘dhënë’ Serbisë” – shkruhet ne artikull.

Rhotert ka kujtuar se gjatë mandatit të parë të Trumpit 2017-2021 ka pasur shumë zyrtarë të lartë amerikanë, si këshilltari i atëhershëm për siguri kombëtare, dhe emisari i atëhershëm për dialogun mes Prishtinës dhe Beogradit, Richard Grenell, që nuk e kanë përjashtuar opsionin e “korrigjimeve territoriale” mes Kosovës dhe Serbisë.