ABSURDI I BE/ Kosova viktimë e sulmeve terroriste, por edhe me sanksione

Dëmtimi i kanalit të Ibër Lepencit në një sulm terrorist që e kanë dënuar nga shumë adresa, ndodhi pikërisht në ditën kur në BE u krye pranim-dorëzimi mes strukturave të vjetra dhe atyre të reja.

Për Joseph Borrellin ndoshta ishte simbolikë e pafat, por edhe dëshmi e realitetit, fakti se në ditën e fundit iu desh të flasë për një sulm terrorist në Kosovë. Kjo ishte edhe dëshmi e dështimit të madh të tij  në procesin e dialogut që thuhet se ka për qëllim normalizimin e raporteve mes Kosovës dhe Serbisë.

Pas pesë vjetësh përpjekjeje të Borrellit dhe Lajçakut, raportet mes Kosovës dhe Serbisë janë më pak normale. Ato janë për me tepër armiqësore. Dhe nuk është ekzagjerim të thuhet se tensionet në raporte kanë potencial të shpërthimit të luftës. Se sa jonormale janë raportet, Lajkçak, i cili e flet rrjedhshëm gjuhën serbe, mund të kuptosh nëse dëgjon konferencën për shtyp të presidentit të Serbisë, Aleksandar Vuçiq. Të dëgjosh se me çfarë epitetesh ai flet për Kosovën, nga “e ashtuquajtura Kosovë” deri tek “okupatorët”. Këto fjalë janë të qëllimshme dhe kanë për qëllim të nxisin serbët kundër Kosovës dhe të legjitimojnë sulmet ndaj organeve të Kosovës. Ndërsa për serbët në institucione të Kosovës tha se janë “tradhtarë”. Ndërsa i fyu rëndë edhe zyrtarët perëndimorë.

Jo që nuk ka pasur përmirësim në raportet mes Kosovës dhe Serbisë, por ka pasur keqësim të madh të këtyre raporteve.  Nëse për dëshmi për sulmin në Ibër-Lepenc duhet pritur, dëshmitë se kush e ka bërë sulmin terrorist në Banjskë nuk ka aspak dyshim, dihet kush e ka bërë dhe ku ndodhen. Dihet, po ashtu, edhe kush ishin ata që sulmuan ushtarët e KFOR-it dhe mediat në ngjarjet e dhunshme të muajit maj të vitit 2023.

Për më tepër, BE-ja akoma mban masat ndëshkuese ndaj Kosovës dhe nuk e ka ndërmend t’i heqë. Ky është absurdi i BE-së, e cila pranon se Kosova është viktimë e sulmeve terroriste, i ofron ndihmë, por i mban sanksionet ndaj saj. Ndërkohë për Serbinë shumica e madhe e Bashkimit Evropian bëjnë presion ndaj disa vendeve anëtare që të lejojnë avancimin e saj në procesin e negociatave të anëtarësimit, pas tre vjetësh, sa këto negociata janë pothuajse të ngrira praktikisht.