Gazetari Artan Hoxha ka krahasuar aferën ÇEZ-DIA me skandalin McGonigal pasi në të është përfshirë sipas tij një shtetase amerikane.
Ai tha se kur u paraqit në Prokurori vuri në dispozicion informacionet që zotëronte dhe dy filmime që i shërbenin historisë.
“Kjo është pjesë e materialit që ka prokurori. Kemi një tjetër dëshmi që është dhënë në Austri. Kjo është një çështje që i është bërë presion drejtësisë dhe u mbyll vetëm me rastin Ismailaj. Ndërkohë bashkeshortja dhe familja e tij u larguan jashtë vendit për të kërkuar azil politik në Austri.
Unë u paraqita në prokurori kur më kërkuan, dhe i vura në dispozicion të hetimit informacionin që kisha unë. Kishte dy filmime që i shërbejnë historisë. Është e ngjashme me historinë e McGonigal. Edhe këtu kishte një amerikane. Nëpërmjet këtyre parave ishin bërë pagesat që kërkojnë prokurorët. Sot kanë ndryshuar rrethanat, nuk është më i njëjti presion. Prokuroria sot ka më shumë mjete, si logjistike, ligjore fizike. Prokuroria sot ka vendosur të veprojë”, deklaroi ai.
Në intervistën për gazetarin Endri Xhafa ai theksoi ndër të tjera se ministra të qeverisë së majtë që do të thirren në SPAK.
“Unë shpresoj që aty të shikojmë ministra të qeverisë së majtë që do të thirren aty. Nëse kjo çështje kufizohet vetëm te Meta, atëherë është ajo që thotë Meta. Për mua është një bast i vërtetë për aftësitë e SPAK. Detaje të pamjeve nuk mund të jap se janë çështje të hetimit. Ka aq shumë çështje saqë mua më vinte çudi që hetimet nuk shkonin deri në fund”, u shpreh Hoxha.