Ditën e fejesës 52 vjeçari i plagosi vajzën/ Babai i vajzës pas 15 vitesh vrau autorin, kërkohet burg përjetë për Islam Matën

–Prokuroria e Dibrës ka kërkuar dënim me burg të përjetshëm për Islam Matën, i cili vrau me armë gjahu 52-vjeçarin Petrit Pupla më 21 janar 2024. Shkak për ngjarjen është bërë plagosja e vajzës së Islam Metës nga Petrit Pupla rreth 15 vite më parë. Ky i fundit mësohet se ka qenë i dashuruar me vajzën e autorit, por Islam Mata ka qenë kundër dhe e ka fejuar vajzën me dikë tjetër. Ditën e fejesës Pupla ka plagosur vajzën. Që prej asokohe konfliktet mes dy familjave kanë qenë të vazhdueshme dhe vetë Mata e kishte paralajmëruar se do e vriste.

NJOFTIMI:

Prokuroria pranë Gjykatës së Shkallës së Parë e Juridiksionit të Përgjithshëm, Dibër, kërkon deklarimin fajtor dhe dënimin me burgim të përjetshëm të shtetasit I.M. për kryerjen e veprës penale “Vrasja me paramendim”, parashikuar nga neni 78/2 i Kodit Penal, në dëm të viktimës P.P.

Nga hetimet mbi procedimin penal nr.27, regjistruar më datë 22.01.2024, rezultoi se shtetasi I.M. ka vrarë me armë zjarri shtetasin P. P. i cili ishte duke ecur në fshatin Vig me një tjetër person. Sapo ka kryer aktin, ai ka lajmëruan policinë dhe u largua drejt banesës së tij.

Djali i autorit, ka sqaruar se babai i tij kishte konflikt të vjetër me këtë shtetas pasi ai i kishte plagosur me armë vajzën e tij si dhe vajzën e vëllait, veprim për të cilin ai u dënua me 12 vite burgim. Për këtë konflikt, megjithëse viktima kishte kryer dënimin palët nuk ishin pajtuar. Madje, kohët e fundit, para 3-4 muaj para se të ndodhte vrasja, shtetasi I.M. i dërgoi mesazh nëpërmjet dajës së tij, që viktima të mos shkonte më në fshat se nëse do t’i dilte para do ta vriste.

Sa më sipër, rezultoi e provuar se i pandehuri I.M. ka konsumuar tërësisht elementet e veprës penale “Vrasja me paramendim”, parashikuar nga neni 78/2 i Kodit Penal, e provuar nga kryerja e veprimeve hetimore. Motivi i kësaj ngjarje kriminale është hakmarrja, pasi viktima ka qëlluar dhe plagosur vajzën e të pandehurit.

Prokuroria pranë Gjykatës së Shkallës së Parë të Juridiksionit të Përgjithshëm, Dibër kërkon deklarimin fajtor të të pandehurit I.M. për kryerjen e veprës penale “Vrasja me paramendim”, parashikuar nga neni 78/2 i Kodit Penal, në dëm të viktimës P.P. dhe dënimin e të pandehurit me burgim të përjetshëm.