E pabesueshme/ Plani ambicioz Kosovë-Shqipëri: Në NATO brenda vitit…

A mundet Kosova, falë kryesimit të Shqipërisë të Komisionit për Partneritet të Kartës Amerikano-Adriatike, të bëhet anëtare e Partneritetit për Paqe dhe më pas në NATO? Sipas disa analistëve, ky nuk është skenari real për momentin, sepse pengesa më e madhe për këtë janë ende katër vende anëtare të Aleancës që nuk e njohin pavarësinë e Kosovës.

Analisti ushtarak serb Vlade Raduloviç tha se kryesimi i Shqipërisë ne Komisionin për Partneritetin e Kartës Amerikano-Adriatike, të cilin e mori më 1 janar, nuk mund të ndikojë dhe kontribuojë në asnjë mënyrë në anëtarësimin e Kosovës në NATO, pavarësisht se çfarë deklaratash mund të dëgjohen nga politikanët në Prishtinë apo Tiranë, pasi vendimet merren me konsensus dhe se jo të gjithë anëtarët e Aleancës e kanë njohur pavarësinë e Kosovës.

Ekspertët shqiptarë të fushës së sigurisë pohojnë se për shkak të kushteve të krijuara, Kosova do të jetë më afër asaj organizate si dhe NATO-s.

Deputeti i Partisë Demokratike të Kosovës dhe anëtari i Komisionit për Siguri dhe Mbrojtje të Kuvendit të Kosovës, Hisen Berisha, tha se Kosova duhet të plotësojë disa kritere dhe të marrë vendime të caktuara politike për t’u bërë anëtare e nismës, ndërsa eksperti i sigurisë Hajrullah Ternava beson se presidenca e Shqipërisë do të kontribuojë pozitivisht në procesin e Kosovës drejt NATO-s.

Komisioni i Partneritetit Karta Amerikano-Adriatike (A-5) është një iniciativë për një politikë sigurie të natyrës rajonale për të cilën u ra dakord në samitin e NATO-s në Pragë. Iniciativa deri më tani është nënshkruar nga presidentët e Shqipërisë, Kroacisë, Maqedonisë së Veriut, SHBA-së, Malit të Zi dhe Bosnjë-Hercegovinës, ndërsa Serbia, Sllovenia dhe Kosova kanë statusin e vëzhguesit.