Paketat e kompensimit për drejtuesit e kompanive më të mëdha amerikane u rrit me gati 13% vitin e kaluar, një përqindje rritjeje shumë më e lartë sesa pagat e punonjësve, ndërsa familjet amerikane ndjenin pasojat e inflacionit të lartë.

Paketa mesatare e pagave për shefat ekzekutivë u rrit me 12.6% duke arritur në 16.3 milionë dollarë, sipas të dhënave të analizuara për agjencinë Associated Press nga firma e analizimit të të dhënave, Equilar.

Ndërkohë, pagat dhe fitimet e tjera për punonjësit e sektorit privat u rritën me 4.1% në vitin 2023. Drejtorët ekzekutivë u shpërblyen pasi ekonomia shfaqi një qëndrueshmëri të jashtëzakonshme, duke sjellë fitime të larta dhe duke rritur vlerën e aksioneve në bursë.

Pasi u përballën me pandeminë, kompanitë u përballën me sfida nga inflacioni i vazhdueshëm dhe normat më të larta të interesit. Rreth 25 shefa ekzekutivë morën një rritje prej 50 % ose më shumë.

“Në tregun e pas pandemisë, bordet kanë shfaqur prirjen t’i shpërblejnë dhe t’i mbajnë drejtuesit ekzekutivë kur mendojnë se ata janë udhëheqës të mirë. Këta faktorë kanë ndikuar tek vendimet për rritjen e kompensimeve”, thotë Kelly Malafis, partnere në firmën “Compensation Advisory Partners” në Nju Jork.

Por Sarah Anderson, e cila drejton Projektin për Ekonominë Globale në Institutin për Studime Politike, beson se hendeku në të ardhura midis drejtuesve të lartë dhe punëtorëve, ushqen pakënaqësinë e përgjithshme për ekonominë mes amerikanëve.

“Faktori kryesor është inflacioni. Njerëzit po i ndjejnë pasojat e tij dhe ajo që i bën edhe më të ndjeshme këto pasoja është rritja e pamjaftueshme e pagave”, thotë ajo.

Analiza e AP-së për kompensimin e ekzekutivëve të lartë, përfshinte të dhëna pagash për 341 drejtues, të cilët kanë shërbyer për të paktën dy vjet radhazi në kompanitë e tyre.

Në krye të listës është Hock Tan, shef ekzekutiv i kompanisë Broadcom Inc., me një paketë kompensimi me vlerë rreth 162 milionë dollarë. Atij iu premtua një pjesë e fitimeve të aksioneve nëse atyre u rritej vlera në bursë. Më 28 maj ky synim u arrit. Në vitin 2023 aksionet e kompanisë shiteshin në bursë me 470 dollarë. Më 28 maj ato arritën vlerën rekord prej 1,436,17 dollarësh.

Rritja galopante e kompanisë së teknologjisë Broadcom i atribuohet suksesit në fushën e Inteligjencës Artificiale.

Shefa të tjerë ekzekutivë në krye të listës së përpiluar nga AP, janë William Lansing i kompanisë “Fair Isaac Corp” (66.3 milionë dollarë); Tim Cook i kompanisë “Apple Inc.” (63.2 milionë dollarë); Hamid Moghadam i kompanisë “Prologis Inc.” (50.9 milionë dollarë); dhe Ted Sarandos, bashkë-drejtues i kompanisë “Netflix” (49.8 milionë dollarë).

Kompensimi i zotit Cook përfaqësoi një rënie prej 36% nga një vit më parë.

Megjithëse dokumentet për letrat me vlerë tregojnë se Elon Musk nuk ka marrë asnjë kompensim si shef ekzekutiv i Teslas, paga e tij është një nga temat kryesore në kompaninë e makinave elektrike.

Zoti Musk po u kërkon aksionerëve të rikthejnë një paketë kompensimi për të, që u hodh poshtë nga një gjykatës i cili kishte thënë se procesi i miratimit të paketës kishte pasur shumë të meta. Kompensimi, kryesisht aksione me vlerë 2.3 miliardë dollarë kur u caktua në vitin 2018, tani vlerësohet të jetë rreth 45 miliardë dollarë.

Paga e shefave ekzekutivë përballë asaj të punonjësve

Punonjësit në të gjithë vendin kanë pasur rritje pagash që nga pandemia. Pagat dhe përfitimet për punonjësit e sektorit privat u rritën 4.1% në 2023 pas një rritje prej 5.1% në 2022, sipas Departamentit të Punës.

Por edhe me këto rritje, hendeku mes drejtuesve të lartë dhe gjithë të tjerëve vazhdon të thellohet. Gjysma e drejtuesve u pagua 196 herë më shumë se sa një punonjës mesatar në kompaninë e tyre. Një vit më herët kjo diferencë ishte 185 herë.

Hendeku është veçanërisht i thellë në kompanitë ku punonjësit zakonisht fitojnë paga më të ulëta, siç janë shitësit me pakicë. Bordet e korporatave shpesh ndjejnë presion për të vazhduar rritjen e pagave për drejtuesit e suksesshëm nga frika se ata mund të largohen dhe të kompensohen më mirë nga një kompani rivale. Zonja Malafis thotë se bordet i kushtojnë më shumë vëmendje paketave të kompensimit kokurruese brenda industrisë sesa raportit mes pagave të tyre dhe atyre të punonjësve.

Dallimi mes fitimeve të shefave ekzekutivë dhe punonjësve të tyre nuk ka qenë gjithmonë kaq i thellë. Pas Luftës së Dytë Botërore dhe deri në vitet 1980, drejtuesit e kompanive të mëdha fitonin rreth 40 deri në 50 herë më shumë sesa paga mesatare e punonjësve, thotë Brandon Rees, zëvendësdrejtor i rrjetit të sidikatave AFL-CIO dhe ka një faqe interneti ku analizohen pagat e drejtuesve të korporatave.

“Raporti (aktual) i pagave pasqyron një filozofi sipas së cilës fituesi merr gjithçka dhe tregon se kompanitë i trajtojnë drejtuesit ekzekutivë si yje dhe jo si pjesëtarë të një ekipi”, thotë ai.

Rritet numri i grave në krye të kompanive

Numri i grave të përfshira në analizën e AP-së këtë vit ishte më i madh sesa në vitet e mëparshme, por numri i tyre në postet më të larta është ende i vogël në krahasim me homologët e tyre meshkuj. Nga 341 drejtues të përfshirë në të dhënat e kompanisë Equilar, 25 ishin gra.

Lisa Su, drejtuese ekzekutive dhe kryetare e bordit të prodhuesit të mikroprocesorëve “Advanced Micro Devices” ishte më e paguara mes grave në sondazhin e AP për të pestin vit radhazi në vitin fiskal 2023, me një kompensim me vlerë 30.3 milionë dollarë. Renditja e saj e përgjithshme u rrit në vendin e 21-të nga i 25-ti.

Mes drejtueseve të tjera gra më të paguara ishin Mary Barra e kompanisë së prodhimit të automjeteve “General Motors” (27.8 milionë dollarë); Jane Fraser e gjigantit bankar “Citigroup” (25.5 milionë dollarë); Kathy Warden e kompanisë së mbrojtjes “Northrop Grumman Corp.” (23.5 milionë dollarë); dhe Carol Tome e kompanisë private postare “UPS Inc.” (23.4 milionë dollarë).

Paketa mesatare e pagave për drejtueset femra u rrit me 21% në 17.6 milionë dollarë. Kjo rritje ishte më e madhe sesa ajo mes drejtuesve burra: paketa mesatare e pagave të tyre u rrit me 12.2% në 16.3 milion dollarë. /VOA/

Pas sulmit në Mannheim, një video afërsisht një minutëshe u shfaq në platformën TikTok, në të cilën një burrë me pseudonimin “Imam Meti” lavdëronte në gjermanisht terroristin dhe bëri thirrje për akte dhune islamike.

Burri pohoi, ndër të tjera, se sulmuesi i Mannheim-it meritonte “nivelin më të lartë në parajsë” dhe se ai ishte “modeli i tij”.

Sipas informacioneve të SPIEGEL, autoritetet e sigurisë tani kanë identifikuar personin në video.

Më konkretisht bëhet fjalë për Muhamed R., i lindur në vitin 1988 në Prishtinë.

35-vjeçari ka qenë prej kohësh në survejimin e autoriteteve. Sipas qarqeve të sigurisë, ai ka shpërndarë në të kaluarën video të shumta me përmbajtje islamiste dhe antisemite.

Në fund të vitit të kaluar, për shembull, thuhet se ai ka bërë thirrje që njerëzit të udhëtojnë në Izrael dhe të sulmojnë shtetin izraelit.

Për më tepër, ai jetoi në Gjermani nga viti 1991 deri në 2019.

Në vitin 2018, gjykata e rrethit të Hamburgut lëshoi ​​një urdhër penal kundër tij – për rezistencë ndaj oficerëve të zbatimit të ligjit në lidhje me fyerje dhe lëndim trupor me dashje.

Disa vite më parë, autoritetet e Hamburgut filluan gjithashtu procedurat e dëbimit kundër tij. Mirëpo, 35-vjeçari, i cili mësohet se ka përdorur disa identitete të mbuluara, është fshehur dhe që atëherë është në kërkim nga autoritetet. Rrethet e sigurisë dyshojnë se ai ndodhet jashtë vendit. Sipas informacioneve të SPIEGEL,  atij i ndalohet hyrja në zonën Shengen.

Hetimet lidhur me sulmin në Mannheim po drejtohen nga autoriteti më i lartë hetimor i Gjermanisë, Prokurori i Përgjithshëm. Akti klasifikohet si “i motivuar fetarisht” dhe ka të ngjarë të rrezikojë sigurinë e brendshme.

Një ngjarje e rëndë është shënuar pasditen e kësaj të hëne në Gjermani.

Një person, ende i paidentifikuar, ka qëlluam me armë zjarri në mes të rrugës në Mynih.

Nga të shtënat, një person ka mbetur i plagosur rëndë.

Policia po vijon punën për identifikimin dhe kapjen e autorit, ndërsa deri më tani nuk janë bërë të ditura shumë detaje.

Zgjedhja e anëtarëve të jurisë për gjyqin ndaj djalit të Presidentit Joe Biden, Hunter Biden, filloi sot. Kjo pason prishjen e një marrëveshjeje me prokurorët që do të kishte shmangur spektaklin e një gjyqi kaq afër zgjedhjeve të nëntorit të këtij viti.

Hunter Biden, i cili kaloi fundjavën me babain e tij, është akuzuar në Delauer për tre krime, që lidhen me blerjen e një arme në vitin 2018, kur vetë ai ka thënë se ishte i varur nga droga. Ai akuzohet se ka gënjyer një tregtar armësh të licencuar nga qeveria federale, duke bërë një pretendim të rremë në formular se ai nuk ishte përdorues droge dhe se e kishte mbajtur armën në mënyrë të paligjshme për 11 ditë.

Ai është deklaruar i pafajshëm dhe ka argumentuar se është vënë në shënjestër të padrejtë nga Departamenti i Drejtësisë, pasi republikanët e dënuan marrëveshjen me prokurorët, duke e cilësuar atë si trajtim të veçantë për djalin e presidentit demokrat.

Gjyqi vjen vetëm disa ditë pasi ish Presidenti Donald Trump, i cili pritet të jetë kandidat presidencial i republikanëve në zgjedhjet e këtij viti, u dënua për 34 vepra penale në Nju Jork. Një juri e shpalli ish-presidentin fajtor për një skemë për të fshehur një pagesë për të blerë heshtjen e aktores së filmave pornografikë Stormy Daniels, që synonte të shmangte dëmtimin e fushatës së tij presidenciale të vitit 2016. Këto dy çështje penale nuk kanë lidhje me njëra-tjetrën, por afërsia e tyre vendos në qendër të vëmendjes gjyqet penale gjatë fushatës për zgjedhjet e nëntorit të këtij viti.

Hunter Biden do të përballet me një gjyq tjetër në Kaliforni në shtator për akuzat se nuk ka paguar 1.4 milionë dollarë taksa. Të dyja çështjet ishin në plan të zgjidheshin përmes një marrëveshjeje me prokurorët korrikun e kaluar, në kulmin e një hetimi shumëvjeçar të bizneseve të tij.

Por gjykatësja Maryellen Noreika, e cila u emërua në këtë post nga ish Presidenti Trump, vuri në dyshim disa aspekte të pazakonta të marrëveshjes, e cila përfshinte një pranim fajësie për kundërvajtje për të zgjidhur krimet tatimore dhe një marrëveshje për të pushuar çështjen e armëmbajtjes pa leje, nëse Hunter Biden nuk do të bënte shkelje të tjera për dy vite. Avokatët e të dyja palëve nuk mundën të arrinin një zgjidhje të re dhe marrëveshja u prish. Prokurori i Përgjithshëm Merrick Garland më pas emëroi një prokuror të posaçëm në gusht të vitit të kaluar, dhe një muaj më vonë Hunter Biden u padit.

Ky gjyq nuk ka të bëjë me lidhjet e biznesit të zotit Hunter Biden me vende të huaja, që republikanët thonë se vërtetojnë lidhjet e familjes Biden me korrupsionin. Por, gjyqi do të nxjerrë në pah disa nga momentet më të errëta të zotit Hunter Biden.

Aleatët e presidentit janë të shqetësuar për ndikimin që gjyqi mund të ketë mbi Presidentin Biden, i cili për një kohë të gjatë ka qenë i shqetësuar për mirëqenien dhe maturinë e djalit të tij të vetëm të gjallë, gabimet e kaluara të dhimbshme të të cilit tani do të dalin në publik. Ai gjithashtu e ka mbrojtur djalin e tij. Hunter Biden e kaloi fundjavën me të jatin në shtetin Delauer, duke shëtitur me biçikletë dhe shkuar në kishë.

Aleatët e zotit Biden janë gjithashtu të shqetësuar se gjyqi mund të tërheqë vëmendjen nga përpjekjet e presidentit demokrat për të përmirësuar rezultatet jo të mira në anketa dhe përgatitjet për debatin e parë presidencial, që pritet të mbahet në fund të këtij muaji.

Prokurorët shpresojnë të vërtetojnë se Hunter Biden ishte përdorues droge kur bleu armën dhe për këtë arsye gënjeu në formular. Ata kanë thënë se po planifikojnë të përdorin si provë historitë e tij të botuara dhe mund të prezantojnë gjithashtu dokumentet e gjetura në një laptop që ai e la në një dyqan riparimi në Delauer. Të dhënat e ruajtura në laptop u përmendën shpesh nga republikanët në vitin 2020, duke përfshirë një foto personale në të cilën ai është pa rroba dhe duke bërë drogë.

Gjykatësja do t’i bëjë kandidatëve një sërë pyetjesh për të përcaktuar nëse ata mund të shërbejnë në mënyrë të paanshme në juri, duke përfshirë nëse ata kanë dhënë fonde për fushatat politike apo nëse kanë kandiduar për poste politike. Ajo do t’i pyesë kandidatët për anëtarë jurie nëse pikëpamjet e tyre për fushatën presidenciale të vitit 2024 do të pengojnë mundësinë e tyre për të qenë të paanshëm.

Gjykatësja gjithashtu do të pyesë nëse ata besojnë se Hunter Biden po ndiqet penalisht për shkak se babai i tij është president. Gjithashtu, ajo do të pyesë për blerjen e armëve dhe çështjet e varësisë nga droga, duke përfshirë: “A besoni se dikush që është i varur nga droga nuk duhet të akuzohet për një krim?”

Akuzat kundër zotit Hunter Biden përqëndrohen në një periudhë, në të cilën ai vetë e ka pranuar se ka qenë i varur nga droga. Ai filloi të përdorte drogën dhe të pinte alkool në sasi të madhe në vitin 2015, pas vdekjes së vëllait të tij, Beau Biden, nga kanceri. Ai bleu dhe mbajti një armë për 11 ditë në tetor të vitit 2018, por në formularin për blerjen e armës kishte deklaruar se nuk ishte përdorues droge.

Hunter Biden është deklaruar i pafajshëm në të dyja rastet dhe avokatët e tij kanë sugjeruar se ata mund të argumentojnë se ai nuk e shihte veten si njëri i varur nga droga kur prokurorët thonë se ai kishte thënë në formular se nuk ishte përdorues droge. Ata gjithashtu do të sulmojnë besueshmërinë e pronarit të dyqanit të armëve.

Ndërkohë, prokurorët po planifikojnë gjithashtu të thërrasin si dëshmitare ish-bashkëshorten e zotit Hunter Biden dhe të venë e vëllait të tij, Hallie, me të cilën ai ka patur marrëdhënie intime.

Nëse shpallet fajtor, Hunter Biden mund të përballet me deri në 25 vjet burg, ndonëse ata që e shkelin ligjin për herë të parë, pothuajse asnjëherë nuk marrin dënim që t’i afrohet maksimumit dhe po ashtu është e paqartë në se dënimi do të përfshijë burgim./VOA