Kur sytë tregojnë për gjendjen e shëndetit tuaj – gjashtë shenja paralajmëruese

Sytë mund të zbulojnë shumë për gjendjen e shëndetit tuaj të përgjithshëm.

Sophie Koh, okuliste dhe këshilltare kombëtare e shërbimeve profesionale në Optometry Australia, ka zbuluar se si mund të kuptoni një sërë sëmundjesh kronike, si diabeti dhe madje edhe kanceri, duke shikuar në sytë e dikujt.

Gjëra të tilla, si njolla gjaku në pjesën e prapme të syrit, nervat optikë të ënjtur, madje edhe një unazë e hirtë rreth kornesë, mund të jenë shenjë se diçka e keqe po ndodh. Sophie shtoi se anomalitë në sy që mund të zbulohen vetëm gjatë një ekzaminimi të syrit mund të jenë shenjë e kancereve të caktuara, një rrezik në rritje për goditje në tru, diabet, sklerozë multiple, kolesterol të lartë ose sëmundje të gjëndrës tiroide.

Megjithëse simptomat nuk janë domosdoshmërisht dëshmi përfundimtare për ekzistimin e kancerit ose ndonjë gjendjeje të veçantë, ekzaminimi i syve mund të ndihmojë në zbulimin e sëmundjes në fazat e hershme.

Çuditërisht, syri mund të jetë vendi i parë që shfaq shenjat e hershme të një sërë kanceresh, duke përfshirë tumoret e trurit, melanomën, leukeminë dhe limfomën. Ënjtja e nervit optik, retinat e gjakosura dhe nishanet e reja ose të parregullta në pjesën e përparme dhe të pasme të syrit mund të tregojnë se diçka serioze po ndodh.

Kjo është një nga arsyet pse është e rëndësishme që fëmijët dhe të rinjtë të bëjnë një ekzaminim të syve, edhe nëse nuk ankohen për probleme me shikimin. Oftalmologu juaj mund të jetë personi i parë që e zbulon këtë gjatë një ekzaminimi rutinë të syve.

Goditja në tru
Gjatë ekzaminimi të syrit, mjekët mund të kapin mpiksje mikroskopike të gjakut në pjesën e pasme të syrit që mund të tregojnë dëmtim të enëve të gjakut nga presioni i lartë i gjakut dhe ndonjëherë nënkuptojnë se dikush mund të ketë më shumë gjasa të ketë një goditje në tru.

Bllokadat ose mpiksjet në retinë mund të jenë shenja e parë që një person është në rrezik të shtuar për goditje në tru. Nëse një pacient përjeton një humbje të papritur të shikimit anësor, mund të jetë gjithashtu një shenjë paralajmëruese se ka ndodhur dëmtimi i trurit.

Diabeti
Ekspertët gjithashtu mund t’i dallojnë shenjat e hershme të diabetit.

Retinopatia diabetike prek kapilarët në retinë dhe fillimisht shfaqet si njolla gjaku në pjesën e pasme të syrit, të cilat mund të merren gjatë ekzaminimeve rutinë të syrit.

Ndryshime më drastike të shikimit nuk vërehen derisa gjendja të përparojë në faza të avancuara, kështu që ekzaminimet e rregullta të syve mund ta zbulojnë herët anomalinë.

Skleroza multiple
Skleroza e shumëfishtë mund të shkaktojë një gjendje të quajtur neuriti optik, ku nervi optik fryhet dhe shkakton shikim të paqartë.

Për gati 25 për qind të njerëzve të diagnostikuar me MS, neuriti optik ishte simptoma e parë që përjetuan.

Niveli i lartë i kolesterolit
Nëse shihni një unazë të bardhë, të kaltër ose ngjyrë hirir përreth kornesë, mund të nënkuptojë se ka një grumbullim të kolesterolit në qarkullimin e gjakut.

Kjo mund të ndodhë edhe në të tridhjetat edhe në të dyzetat. Okulisti juaj mund të rekomandojë analiza shtesë për të vlerësuar nivelet e kolesterolit në gjak.

Kolesteroli i lartë duhet të merret seriozisht sepse mund të jetë një pararendës i kushteve kërcënuese për jetën, siç është goditja në tru.

Sëmundja e gjëndrës tiroide
Sipas Fondacionit Australian të Tiroides, më shumë se një milion australianë jetojnë me një çrregullim të padiagnostikuar në tiroide.

I lidhur me një çrregullim autoimun të quajtur sëmundja e Graves, hipertiroidizmi jo vetëm që mund t’i bëjë sytë tuaj të skuqur dhe të kruhen, por në raste më serioze mund të shkaktojë ënjtjen e muskujve të syrit duke shkaktuar shikim të dyfishtë.

Ekzoftalmusi që njihet si dalje e njërit apo të dy syve përpara mund të përkojë me sy të thatë, shikim të paqartë ose shikim të dyfishtë.