Më e gjata që nga viti 1961, vendet skandinave goditen nga vala e nxehtësisë me temperatura deri në 30 gradë Celsius

Temperatura ekstreme, mbi 30°C, u regjistruan në zonat e Rrethit Arktik, me Finlandën që regjistroi tre javë radhazi me valë të nxehti dhe Norvegjinë që numëroi 13 ditë me temperatura mbi 30°C në korrik. Sipas shkencëtarëve, kjo është periudha më e gjatë e valës së të nxehtit e regjistruar që nga viti 1961.

Klimatologia Mika Radanen nga Instituti Meteorologjik Finlandez vuri në dukje se “vala e të nxehtit është ende në kulmin e saj” me temperatura që arrijnë në 32-33°C . “Edhe rajonet e Arktikut… kanë përjetuar tre javë me temperatura mbi 25°C dhe nesër ato mund të tejkalojnë rekordet e temperaturave të gushtit.”

Paralajmërime nga shërbimet meteorologjike nordike

Instituti Meteorologjik Norvegjez konfirmoi se të paktën një stacion meteorologjik në tre rajonet më veriore të vendit regjistroi temperatura mbi 30°C për 12 ditë në korrik. Edhe pse pati një lehtësim të përkohshëm nga vala e të nxehtit, autoritetet paralajmëruan se pritej një rritje e re e temperaturave gjatë fundjavës.

Në Suedi, temperatura në Haparanda mbeti vazhdimisht mbi 25°C për 14 ditë, ndërsa në Jokkmokk në Lapland fenomeni zgjati për 15 ditë.

Vala e të nxehtit filloi në mesin e korrikut, e nxitur nga ujërat e ngrohta në bregdetin verior norvegjez dhe një sistem i fuqishëm me presion të lartë që i shtyu temperaturat deri në 10 gradë mbi normalen për sezonin. Në të njëjtën kohë, pjesë të Evropës Veriore u goditën nga stuhitë dhe rrufetë që shkaktuan zjarre.

Nxehtësia ekstreme i ka zënë në befasi banorët e këtyre zonave. Në fakt, sipas mediave finlandeze,  një pistë akulli në veri të vendit ka hapur dyert për qytetarët që të freskohen.