Pandemia e koronavirusit, Putin: Të gjitha vaksinat ruse anti-Covid janë të sigurta dhe efikase

Presidenti i Rusisë, Vladimir Putin u shpreh se vaksinat ruse anti-Covid janë të gjitha efektive. Gjatë një samiti të Organizatës së Bashkëpunimit të Shangait, ai tha se Rusia ka krijuar 2 vaksina anti-Covid që janë janë të sigurta dhe efikase dhe gjithashtu shtoi se një vaksinë e re po del në dritë. Më tej Putin shprehu dëshirën e bashkëpunimit mes vendeve për të ndihmuar sa më shumë persona në të gjithë botën të cilat janë infektuar me Covid-19.

“Ka tashmë dy vaksina të patentuara. Dhe studimet kanë treguar dhe konfirmuar se, këto vaksina janë të sigurta dhe nuk kanë efekte anësore serioze pas përdorimit të tyre dhe, së dyti, gjithçka është efektive. Ne propozojmë që të mos politizohen këto procese dhe të fillojmë me faktin se njerëzit në të gjithë botën kanë nevojë për këto barna sot. Ne jemi të gatshëm të punojmë me të gjitha vendet e botës dhe, natyrisht, me të gjithë partnerët tanë në kuadrin e OSS,” tha presidenti rus.

Rusia, menjëherë pas deklaratës së Kompanisë Pfizer dhe BioNTech se vaksina e tyre anti-Covid, është 90% efektive, ka thënë se të njëjtën efektivitet ka edhe ajo që ata kanë krijuar. Vaksina ruse “Sputnik V” e Moskës është miratuar në muajin gusht përpara se të përfundonin provat njerëzore, gjë që nxiti edhe shumë kritika nga shkencëtarët.