Ditën e sotme rreth orës 10:50,  është raportuar për një aksident trafiku të ketë ndodhur në rrugën Dragash-Zhur (Laku i Keq).

Një aksident mes dy automjeteve ka ndodhur në Dragash, ku si pasojë kanë vdekur dy persona.

Viktimat janë një grua e moshës 42-vjeçare dhe një fëmijë 3-vjeçar, njofton Klankosova.tv.

“Me datën 03.06.2024, rreth orës 10:50 është raportuar për një aksident trafiku të ketë ndodhur në rrugën Dragash-Zhur (Laku i Keq). Lidhur me rastin janë njoftuar njësitë kompetente policore të cilët menjëherë kanë dalë në vendngjarje”, thuhet në njoftimin e policisë.

“Bazuar në informacionet e para ne ketë aksident janë te përfshira një kamion me rimorkio dhe një automjet i udhëtareve, si pasojë e këtij aksidenti dyshohet se dy person ka ndërruar jetë ( një grua 42-vjeçare dhe një fëmijë 3-vjeçar ), vdekjen e tyre e ka konstatuar stafi kompetent Emergjencës se spitalit rajonale ne Prizren, ndërsa për rastin tjetër vdekjen e kana konstatuar Emergjenca e QKUK-ës ne Prishtinë, pasi qe personi për shkak te lëndimeve është dërgua ne Prishtinë”.

Lidhur me rastin dhe mjetet e përfshira në aksident, janë duke u kryer hetimet nga njësia e Trafikut Rajonal e Prizrenit.

Në vendin e ngjarjes kanë ndalur edhe zyrtar të lartë nga Njësia e trafikut rajonal, prokurori i rastit dhe njësite e tjera relevante.

Me urdhër të prokurorit të shtetit trupat e pa jetë dërgohen ne IML Prishtinë, ndërsa i dyshuari pas marrjes se ndihmës se parë  ndalohet për 48 në ndalim policor me urdhër të prokurorit të shtetit.

Ish-zëdhënësi i NATO-s gjatë kohës së luftës në Kosovë, Jamie Shea, pas avancimit të statusit të Kosovës në Asamblenë Parlamentare të NATO-s, konsideroi se tani është momenti i duhur që aleatët të shtyjnë përpara ambicien e Kosovës për t’u anëtarësuar në programin e bashkëpunimit mes shteteve partnere euroatlantike dhe NATO-s apo Partneritetin për Paqe, pasi kjo do ta afrojë Kosovën më pranë NATO-s dhe do të ndihmojë në përmirësimin e mëtejshëm të ndërveprimit ndërmjet NATO-s dhe Forcave të Sigurisë së Kosovës.

Por duke qenë se brenda NATO-s janë katër shtete mosnjohëse – Spanja, Greqia, Rumania dhe Sllovakia – atëherë rruga e vendit të vogël drejt përmbushjes së këtij synimi madhor vlerësohet tejet e vështirë. Por, avancimi i statusit së Kosovës në Asamblenë Parlamentare të NATO-s konsiderohet të jetë koha e duhur edhe për rihapjen e debatit për anëtarësimin e Kosovës në Partneritetin për Paqe.

“Samiti i 75-vjetorit të NATO-s në Uashington në muajin korrik është një mundësi ideale sepse aleatët do të kërkojnë rezultate dhe veprime konkrete për të demonstruar se NATO është duke ecur përpara dhe është duke rritur stabilitetin në Ballkanin Perëndimor kundër ndikimit keqdashës rus” – deklaroi Shea.

Asambleja Parlamentare e NATO-s nuk është organ zyrtar i aleancës ushtarake të udhëhequr nga Shtetet e Bashkuara të Amerikës (SHBA), por shërben si një urë lidhëse mes NATO-s dhe parlamenteve të vendeve anëtare. Megjithatë, vlerësoi specialisti i sigurisë, injorimi i vullnetit të parlamentarëve të zgjedhur nuk është një lëvizje e mençur për t’u bërë.

Në favor të avancimit të statusit të Kosovës votuan shumica e vendeve anëtare, një votë ka qenë kundër dhe 14 vende tjera kanë abstenuar nga votimi i 27 majit 2024, në kuadër të sesionit pranveror të Asamblesë Parlamentare të NATO-s, që sivjet u mbajt në Sofje të Bullgarisë.

E derisa vazhdon lufta në Ukrainë, pasiguria do të jetë realitet i përhershëm, ndërsa përpjekjet për siguri kombëtare preokupim i vazhdueshëm i Kosovës. Prandaj, anëtarësimi në Partneritetin për Paqe, që synon të rrisë stabilitetin dhe të ndërtojë raporte të forta të sigurisë ndërmjet partnerëve dhe NATO-s, vlerësohet të jetë një hap i rëndësishëm drejt përmbushjes së këtij qëllimi.

Presidenti i Shteteve të Bashkuara, Joe Biden, duhet të emërojë një ‘Emisar Special për njohjen e Kosovës’ nga pesëshja e Bashkimit Evropian, Spanja, Greqia, Sllovakia, Rumania dhe Qipro – propozoi Edward Joseph, ligjërues në shkollën e studimeve të avancuara ndërkombëtare në Universitetin “Johns Hopkins” në Uashington, në një raport të fundit.

Joseph, në pjesën kushtuar rolit të SHBA-së në dialogun e lehtësuar nga BE-ja për normalizimin e raporteve Kosovë-Serbi, propozoi gjithashtu se paralelisht me emërimin e një të dërguari të posaçëm për njohjen e Kosovës, administrata e Bidenit duhet të sanksionojë në Shqipëri dhe Kosovë, liderët që promovojnë ndonjë lloj ‘unifikimi’ të këtyre dy vendeve të pavarura.

“Administrata e Bidenit mund të nxisë ofertën për konvergjencë nëpërmjet emërimit të njëkohshëm të një të dërguari të ri të posaçëm kushtuar njohjes së Kosovës, paralelisht me shpalljen e sanksioneve të SHBA-së për liderët në Shqipëri apo Kosovë që promovojnë bashkimin e Kosovës dhe Shqipërisë” – ka shkruar Joseph mbi zhvillimet e fundit në Ballkanin Perëndimor.

Ai gjithashtu argumentoi se emërimi i një përfaqësuesi të veçantë u tregon të gjitha palëve, duke përfshirë edhe mosnjohësit brenda BE-së, seriozitetin e administratës amerikane për konvergjencën dhe qëllimin e SHBA-së: një zgjidhje dinjitoze, stabilizuese dhe të përhershme të mosmarrëveshjes Kosovë-Serbi që do të çojë në përmbylljen e çështjeve të hapura në këtë rajon.

“Emisari Special për njohjen e Kosovës mund të punojë gjithashtu me ambasadorët e SHBA-së dhe BE-së në vendet që janë bindur nga Serbia për të hequr njohjen e Kosovës… Emërimi i një të dërguari special për njohjen e Kosovës do të nënvizonte pritshmërinë amerikane për ndryshime të vonuara nga vendet evropiane që nuk e njohin Kosovën”, shtoi ndër të tjera Edward Joseph.

Rizgjedhja e Trump si president i SHBA-ve do të ndryshonte shumë gjëra në SHBA dhe në botë. Realisht, askush nuk e di se çfarë saktësisht, por tashmë bazuar në deklaratat e tij, është e qartë se asgjë nuk do të ishte më si më pare dhe presidenti serb Aleksander Vuçiç i lidhi shumë herët ambiciet e tij politike me të.

Shumë kanë harruar se gjatë fushatës së tij elektorale në vitin 2012, Rudy Giuliani, ishkryebashkiaku i njohur i Nju Jorkut, më vonë mik personal dhe avokat i Trumpit, qëndroi disa ditë në Beograd me Vuçiçin” – kujtoi psikologu Žarko Korać për median serbe “Danas”, duke shtuar se “Edhe atëherë, një konstante në fushatat e zgjedhjeve të parakohshme të Vuçiçit, ishte përdorimi i ish politikanëve të njohur rezidentë, të cilët ishin paguar mirë për këtë” si përshembull ish-kancelari gjerman Shroder, ish-kryeministri i Anglisë, Toni Bler dhe ish kqncelari austriak. Disa prej tyre nuk ndihmuan realisht në fushata, por sigurisht që i bënë përshtypje një pjese të elektoratit të Vuçiçit”.

Sipas Žarko Korać, Vuçiç i ka bashkangjitur më së shumti vetes Richard Grenell-in, ish-ambasador shumë i diskutueshëm i Trump në Gjermani, i cili dikur ishte ushtrues detyre i drejtorit të Agjencisë së Sigurisë së SHBA-së, e cila bashkon të gjitha agjencitë e sigurisë amerikane.

“Ky mik i Trumpit është relativisht shpesh herë në Beograd dhe si këshilltar i huaj i paguar mirë i Vuçiçit, sapo ka ndërmjetësuar shitjen e ndërtesës pjesërisht të rrënuar të ish-Ministrisë së Mbrojtjes në Beograd.

Sipas Koraç, shpresa më e madhe e qeverisë aktuale të Serbisë është se zgjedhja e Trump do të largonte pothuajse tërësisht vëmendjen e dobët të SHBA-së nga rajoni dhe kështu do të ndihmonte në realizimin e “botës serbe”.

“Me krizën e NATO-s që sigurisht do të shkaktonte rizgjedhja e Trump-it, Vuçiç shpreson se çështja e kufijve në rajon do të hapet jo vetëm në mënyrë të nënkuptuar, por mjaft eksplicite, që është një nga ambiciet e tij themelore politike” – beson Zharko Korać duke theksuar:

– “Në fund të fundit, Vuçiq nuk ka pasur kurrë marrëdhënie të ngushta politike me administratën e Bidenit, e cila komunikonte me të vetëm përmes ndërmjetësve të saj. Kështu, ndërkohë që pjesa më e madhe e Evropës ka frikë nga rizgjedhja e Trump, e cila do të shkaktonte kaos politik, qeveria në Serbi po gëzohet aspak në mënyrë të maskuar. Dhe kjo tregon se sa larg jemi nga politika pro-evropiane. Dhe tani, shikoni mrekullinë, sipas ideologëve injorantë të SNS-së, Trump shfaqet si një “deus ex machina” që do të ndihmojë në realizimin e tezës së vjetër politike për “kufijtë e brendshëm të padrejtë të ish-Jugosllavisë dhe njohjen e paligjshme të Kosovës, shtet. Pra Jo Putini apo Kina, Trump është shpresa e fundit e nacionalizmit serb”- ironizoi duke përfunduar Zharko Korać. …………

Branislav Gubacki Guta, deputet në Kuvendin e Vojvodinës nga Fronti i Gjelbër-Majtas, tha për Danas se “fakti është se e gjithë bota është “çmendur” dhe se edhe në Amerikë, me vullnetin e qytetarëve të saj, është e mundur që një personazh si Trump, do të jetë presidenti i saj”.

– Duke qenë se pas mandatit të tij të parë nuk kishte “katarsis” në shoqërinë amerikane, për mua është e frikshme vetë mundësia që Trump të bëhet sërish president i SHBA-së, por shpresoj që kjo të mos ndodhë. Vende, si Amerika, kanë ende institucione që nuk mund të “skllavërohen” kurrë deri në fund, siç është, për shembull, me ne në Serbi.

Populistët që evoluojnë në autokratë, autokratë që aspirojnë pushtetin absolut, absolutistët që bëhen diktatorë, janë ende të mundur vetëm në shtetet hibride si Serbia.

Dallimi mes Trump dhe Vuçiqit është se atuti amerikan është rrezik për të gjithë botën, ndërsa “lideri ynë rajonal” fatkeqisht aktualisht është vetëm një kërcënim për ne dhe vendet fqinje.

Meqenëse shpresa vdes e fundit, unë, si themelues i Optimizmit të Ri, për nga natyra e gjërave, besoj në një nevojë organike për drejtësi te çdo qenie njerëzore, madje edhe te qytetarët e Serbisë, dhe se në një moment “transformimi”, do të arrijmë të konsolidojmë dhe krijojmë institucione të cilat do t’i përgjigjen nevojës për të gjithë” – deklaroi bashkëbiseduesi i medias serbe “Danas.”