Serbi-Kosovë, marrëveshja për targat është larg

Serbi-Kosovë, marrëveshja për targat është larg për Vuçiç

Presidenti serb Aleksandër Vuçiç tha se nuk sheh asnjë mundësi për marrëveshje për çështjen e targave të makinave për serbët e Kosovës, pavarësisht optimizmit të zyrtarëve të BE-së.

Më 1 shtator, obligimi i popullatës serbe të Kosovës që të zëvendësojë targat e makinave të lëshuara nga institucionet serbe me ato kosovare me simbolin RKS, Republika e Kosovës, bëhet i detyrueshëm. Kjo është diçka që Beogradi nuk e pranon duke mos e njohur pavarësinë dhe sovranitetin shtetëror të Kosovës, ende e konsideruar prej saj si krahinë jugore e Serbisë me shumicë shqiptare.

Për ndërrimin e targave, serbët kanë dy muaj kohë, deri në fund të tetorit, gjë që i bën të sigurt dhe thelbësisht optimistë liderët e BE-së, të cilët ndërmjetësojnë dialogun ndërmjet Beogradit dhe Prishtinës.

Brukseli duket i bindur dhe shpresa është që mosmarrëveshja të zgjidhet siç ndodhi ditët e fundit me problemin e dokumenteve të identitetit.

“Fushata e regjistrimit (të targave të reja) fillon më 1 shtator dhe do të zgjasë dy muaj. Më 1 shtator nuk pres asnjë dramë, nuk ka arsye, kemi dy muaj për të gjetur një zgjidhje, siç e kemi gjetur për dokumentet e identitetit”, tha i dërguari i posaçëm i BE-së, Miroslav Lajçak.

Nga ana tjetër,  Kfor-i, Forca e NATO-s në Kosovë, ka bërë të ditur se po ndjek dhe monitoron me vëmendje të madhe situatën në terren, me forcimin e patrullave të saj, të dislokuara veçanërisht në pikat kryesore kufitare, në skenën e një muaji të ashpër me protestat e serbëve që ngritën postblloqe dhe barrikada, një situatë tensioni e lartë në të cilën Prishtina nën presionin e BE-së dhe SHBA-së pranoi të shtyjë për një muaj hyrjen në fuqi të masave kufizuese të dokumenteve dhe targave.

Ndërkohë, si pjesë e dialogut të lehtësuar nga BE-ja, Serbia është pajtuar që të heqë dokumentet hyrëse/dalëse për mbajtësit e letërnjoftimeve të Kosovës dhe Kosova është pajtuar që të mos i prezantojë ato për mbajtësit e letërnjoftimeve.

Këtë e ka bërë të ditur Përfaqësuesi i Lartë i BE-së, Josep Borrell, në Twitter.

“Serbët e Kosovës, si dhe të gjithë qytetarët e tjerë, do të mund të udhëtojnë lirshëm ndërmjet Kosovës dhe Serbisë duke përdorur kartat e tyre të identitetit. BE-ja sapo ka marrë garanci për këtë nga kryeministri Kurti. Kjo është një zgjidhje evropiane. Ne i urojmë të dy liderët për vendimin”, shtoi ai.