Shitet mjegull/ Me ndryshimin e kufijve të Ukrainës, vihet në pikëpyetje vetoja ruse për statusin e Kosovës

Marko Miskelin, bashkëpunëtor në Qendrën për Stabilitet Social, vlerësoi se është e vështirë të imagjinohet që në negociatat për t’i dhënë fund luftës në Ukrainë, SHBA-të do ta lejonin Rusinë të mbante Krimenë, pasi kjo do të thoshte shembje e mëtejshme e së drejtës ndërkombëtare, dhe se pyetja kryesore për Serbinë është nëse qëndrimi i Moskës për çështjen e mosnjohjes së Kosovës do të ndryshonte në atë rast.

Ai beson se mosmarrëveshjet territoriale midis Kosovës dhe Krimesë kanë ngjashmëri, por edhe dallime kyçe dhe kujtoi se referendumi u mbajt de facto nën agresion ushtarak, prandaj nuk u njoh as në botë dhe as nga OKB-ja.

“Kur flasim për Krimenë, nuk ka aspiratë për pavarësi, por më tepër një dëshirë për t’u bashkuar me një shtet tjetër, në këtë rast me Rusinë. Pra, ka nuanca, por sigurisht vetë fakti që po flitet për të në mënyrën se si po bëhet është ndoshta treguesi më i mirë i gjendjes së së drejtës ndërkombëtare”, theksoi Miskelin.

Ai paralajmëroi gjithashtu se njohja e Krimesë mund ta ndërlikojë më tej tezën e Perëndimit për “superioritetin moral” dhe këmbënguljen në integritetin territorial të shteteve anëtare të OKB-së.

“Nëse vendoset një precedent në Krime, atëherë nuk mund të themi më se ekziston një rast i veçantë për shkak të të cilit është shkelur paprekshmëria e integritetit territorial, sepse kjo do të ndodhë edhe në rastin e Krimesë. Sidoqoftë, është e drejta ndërkombëtare që do të vazhdojë të vuajë, pavarësisht se çfarë vendoset”, potencoi Miskeljin