Ish-ambasadori i Republikes Federative te Jugosllavisë në Gjermani, Zoran Jeremiç, vlerësoi se prioritetet e Gjermanisë po lëvizin nga Ballkani në Lindje, por se çështja e Kosovës do të mbetet e pandryshuar dhe faktor shantazhi si për Beogradin ashtu edhe për Prishtinën.

“Qëndrimi i Gjermanisë ndaj Kosovës është konstant. Mendohej se pranimi i Kosoves në KiE do të ishte një veprim shumë i pavarur i Gjermanisë pa koordinim me aleatët e saj, kryesisht Francën dhe SHBA-në. Por antaresimi u la për nje kohë tjetër, më paqësore, si faktor për shantazhimin e të dyja palëve, si për Kosovën ashtu edhe për Serbinë, si për pranim ashtu edhe për lëshime shtesë nga të dyja palët” – deklaroi Jeremiç dhe shtoi se

Gjermania ende po përballet me një problem shumë më serioz, luftën në Ukrainë, prandaj prioritetet e saj po zhvendosen nga Ballkani në lindje.

“Në vetë Gjermaninë ka një problem më serioz në lidhje me luftën në Ukrainë e cila mesa duket po transferohet në territorin evropian në kuptimin që aleatët e NATO po përfshihen. Ky formulim i ri dhe vizita e Macron në Berlin po i zhvendos prioritetet e Gjermanisë nga Ballkani në Lindje, ku kërcënohen interesat e saj jetike, kurse rajoni ynë ka mbetur ne vend të dytë’ – theksoi ish ambasadori

I pyetur nëse ky është rezultat i “dy rrymave” në politikën e jashtme gjermane, Jeremic u shpreh se në qendër është rivaliteti i vjetër mes Kancelarisë dhe Ministrisë së Punëve të Jashtme, rivalitet i cili tashmë shihet qartë në marrëdhëniet mes kancelarit Olaf Scholz dhe Ministres së  Jashtme Analene Berbok.

“Ajo që po çon në të ashtuquajturat dy rryma në Gjermani është rivaliteti i vjetër midis dy hallkave, një konflikt midis një politike të egër, agresive të të Gjelbërve të zbatuar nga Ministria e Punëve të Jashtme dhe një politike më racionale, më të moderuar të zbatuar nga Kancelari, i cili është i vetëdijshëm për rrethanat që Ministria e Jashtme shpesh nuk është në dijeni ose i shpërfill” – deklaroi Jeremiç

Presidenti i Turqisë, Recep Tayyip Erdogan, pas takimit me kryeministrin Albin Kurti, deklaroi se Ankaraja do të vazhdojë t’i ofrojë Kosovës mbështetje në të gjitha fushat, por gjithashtu theksoi se është e rëndësishme të sigurohet përparim konkret në uljen e tensioneve ndërmjet Beogradit dhe Prishtinës.

Presidenti Erdogan tha në takim se fokusi është rritja e vëllimit të tregtisë mes Turqisë dhe Kosovës, e cila është afër 750 milionë dollarë, në mbi 1 miliardë dollarë dhe se ka potencial për zhvillimin e marrëdhënieve në shumë fusha, veçanërisht në industria e mbrojtjes.

Sipas një deklarate nga presidenca, Turqia do të vazhdojë ta mbështesë Kosovën në të gjitha fushat dhe se priten hapa nga Kosova, veçanërisht në fushën e luftimit të terrorizmit.

“Ai theksoi se ulja e tensioneve ndërmjet Kosovës dhe Serbisë është e mirëseardhur, si dhe se është e rëndësishme të bëhet progres konkret në këtë çështje”- thuhet në deklaratë.

Kryeministri Albin Kurti, pas takimit me Erdoganin, ka shkruar në platformën “X” se janë diskutuar mundësi të reja për bashkëpunim ekonomik dhe atë të mbrojtjes.

Zyra e Kryeministrit njoftoi se Kurti shprehu mirënjohjen e tij për mbështetjen e vazhdueshme të Turqisë në të gjitha fazat e ndërtimit dhe zhvillimit të Kosovës, si dhe për mbështetjen e Turqisë për anëtarësimin e Kosovës në NATO dhe për votën e deputetëve turq në Asamblenë Parlamentare të Kosovës.

Pa ndonjë incident të theksuar dhe nën kujdesin e Policisë së Kosovës e forcave të KFOR-it, qarkullimi i njerëzve nëpër Urën e Ibrit që ndanë Mitrovicën në dy pjesë ka vazhduar ndër vite. Megjithatë, ndonëse janë arritur dy marrëveshje në Bruksel e janë hartuar plane zbatimi, Ura e Ibrit vazhdon të mos jetë e hapur për qarkullimin e makinave. Kjo temë është riaktualizuar këto ditë, pas paralajmërimeve nga zyrtarë të ndryshëm se ajo do të hapet së shpejti.

Bashkimi Evropian ka reaguar duke thënë se vendimi për hapjen e Urës së Ibrit duhet të merret në kuadër të dialogut të lehtësuar nga BE në Bruksel.

Por cila është historia e Urës së Ibrit dhe e marrëveshjeve që janë nënshkruar për hapjen për qarkullim e që s’po zbatohen ende.

Në vitin 2014, ishte hartuar një plan nga BE-ja për hapjen e Urës së Ibrit për qarkullim me disa elemente. Sipas atij plani kërkohej respektim i Ligjit të Kosovës, realizimi i vlerësimit teknik të strukturës statike të Urës së Ibrit nga BE-ja dhe hartimi i një projekti për rivitalizimin.

Në mars të vitit 2015 për të arritur këtë qëllim, ishte larguar i ashtuquajturi “Parku i Paqes” dhe në vend të tij ishin vendosur disa barrikada betoni, të cilat përsëri vazhdonin ta pengonin lëvizjen e lirë.

Në gusht të vitit 2015, Kosova dhe Serbia kishin arritur marrëveshje për hapjen e urës së Ibrit, ku parashikohej që ajo të hapej për trafik jo më vonë se fundi i qershorit 2016.

Me qëllim të bërjes progres, më 5 gusht 2016, Kosova dhe Serbia ishin marrë vesh me një plan implementimi me qëllim zgjidhjen e problemit të rivitalizimit të Urës.

Pavarësisht gjithë këtyre marrëveshjeve, ura kryesore nuk është hapur dhe vazhdon të jetë temë që po shkakton kokëçarje për Kosovën dhe BE-në edhe pas 8 vitesh.

Ministri i Mbrojtjes së Kosovës, Ejup Maqedonci, ka bërë me dije se është kryer pagesa e parë ndaj SHBA-së për 246 raketat antitank “Javelin”, të cilat do të shtohen në inventarin e FSK-së.

“Ne jemi në proces për blerjen, pra prokurimin e këtij sistemi. Ne kemi ekzekutuar tanimë pagesën e parë për këtë sistem, pra që nënkupton se jo vetëm që është miratuar, por jemi në proceset në vazhdimësi për të pasur në inventarin tonë këtë sistem. Pra është çështje e kryer, Javelin do të jetë pjesë e inventarit të Forcës së Sigurisë së Kosovës”,- ka deklaruar ministri Maqedonci për mediat kosovare.

Më 11 janar Departamenti Amerikan i Shtetit pranoi shitjen e mundshme për Kosovën të 246 raketave “Javelin” në vlerë rreth 75 milionë dollarë, ndërsa Kongresi miratoi në shkurt shitjen e tyre.

Raketa “Javelin” është sistem antitank i prodhuar për ushtrinë amerikane. Prodhimi ka nisur në vitin 1996, ndërsa për herë të parë në fushën e betejës është përdorur në Irak e Afganistan më 2003.

Për publikun e gjerë ky lloj armatimi u bë i njohur pas agresionit rus në Ukrainë. Ushtria ukrainase i ka përdorur këto raketa për shkatërrimin e automjeteve të blinduara ruse, që hynë në territorin e saj.

Falë teknologjisë, ky sistem raketor drejtohet automatikisht drejt objektivit pas lëshimit. Ushtarët mund të ripozicionohen menjëherë dhe të përgatiten për hedhjen e radhës.

Raketa ka aftësi të arrijë shpejtësinë deri në 150 metra në sekond. Vepron në një distancë nga 65 metra deri në 4 mijë metra.

Një raketë “Javelin” kushton rreth 180 mijë dollarë.

Deri më tani janë prodhuar afro 38 mijë raketa të tilla. Rreth 20-25 mijë prej tyre janë përdorur në luftëra apo aksione të ndryshme, pjesa tjetër për testime e stërvitje.

Policia e Tiranës ka vënë në pranga, djalin e ‘gjeneralit të bandës famëkeqe në Tiranë’, Nehat Kullës.

 

I biri i Nehat Kullës, Robert Kulla është arrestuar për dhunë në familje. Sipas policisë dyshohet se 43-vjeçari ka ushtruar dhunë psikologjike ndaj njerkës së tij, e cila është e pajisur me urdhër mbrojtje dhe me vetëgjyqësi i ka thyer çelësin e bravës.

 

Sipas policisë shkak është bërë konflikti për vilën. Të dy kanë certifikatë pronësia dhe akuzojnë njëri-tjetrin për falsifikim. Sipas policisë rasti është i përsëritur.

Djali i Nehat Kullës akuzohet për tre vepra penale.

‘Specialistët për Hetimin e Krimeve të Komisariatit të Policisë Nr. 4 arrestuan shtetasin R. K., 43 vjeç, banues në Tiranë, për veprat penale “Dhuna në familje”, “Vetëgjyqësia”, dhe “Veprime në kundërshtim me vendimin e gjykatës”. Ky shtetas dyshohet se ka ushtruar dhunë psikologjike ndaj bashkëshortes së babait të tij, e cila është e pajisur me urdhër mbrojtje dhe me vetëgjyqësi i ka thyer çelësin e bravës.’- njofton policia.

Robert Kulla nuk është një emër i panjohur për policinë e Tiranës. Ai është arrestuar në shtator të 2016 si autor i dyshuar i një banke të nivelit të dytë në zonën e ish-Bllokut në Tiranë, më 9 gusht të 2016. Në shtëpinë e Kullës policia gjeti disa mijëra euro të cilat dyshoheshin se ishin grabitur në bankën e nivelit të dytë. Por prokuroria gjatë kësaj kohe nuk arriti të vërtetojë se paratë ishin të bankës dhe për këtë arsye kërkoi lirimin e tij disa ditë pas arrestimit. Bashkë me Kullën u arrestuan Roland Liti dhe Alan Babameto.

Nehat Kulla, i njohur si “gjenerali”, një nga krerët e bandave në vitin 1997, ndërroi jetë në moshën 67-vjeçare në 16 qershor 2020 për shkak të Covid. Banda e Nehat Kullës u krijua gjatë trazirave të vitit 1997 në Shqipëri dhe veproi në fshatin Tufinë në Tiranë