31 të vdekur nga bombardimet ruse në Kiev/ Trump reagon ashpër: Sulme të neveritshme

Presidenti i SHBA-së, Donald Trump, shprehu përsëri zemërim ndaj Rusisë pas sulmit të saj të fundit vdekjeprurës në Kiev – një sulm që vrau 31 persona, përfshirë pesë fëmijë – duke e quajtur agresionin “të neveritshëm”.

Duke folur në Shtëpinë e Bardhë, Trump tha se “Shtetet e Bashkuara planifikojnë të vendosin sanksione të reja ndaj Moskës”, pa dhënë detaje specifike.

Por ai shtoi se “nuk e di nëse sanksionet e shqetësojnë”, duke iu referuar Presidentit rus Vladimir Putin.

Vendet perëndimore kanë vendosur një sërë masash financiare kundër Rusisë, duke shkaktuar rënien e ekonomisë, ndërsa ato kërkojnë të godasin burimet e financimit me të cilat Kremlini mban industrinë ushtarake.

“Rusia, mendoj se është e neveritshme ajo që po bën”, u tha Trump gazetarëve. “Mendoj se ajo që po bën Rusia është shumë e trishtueshme. Shumë rusë po vdesin”, tha ai duke iu referuar luftimeve.

Presidenti ukrainas Volodymyr Zelenskyy tha në një postim në rrjetet sociale më 1 gusht se operacionet e shpëtimit pas “sulmit të ndyrë” kishin përfunduar, me 159 të tjerë të plagosur. Midis të vdekurve, shtoi ai, ishte një fëmijë dy vjeç.

“Edhe një herë, ky sulm i ndyrë nga Rusia tregon nevojën për rritje të presionit mbi Moskën dhe sanksione shtesë. Pavarësisht se sa Kremlini e mohon efektivitetin e tyre, sanksionet funksionojnë – dhe ato duhet të forcohen”, shkroi Zelensky.

Presidenti amerikan Donald Trump tha se i dërguari i tij i posaçëm, Steve Witkoff, do të udhëtojë për në Moskë pas një udhëtimi në Izrael, ku po diskuton situatën në Gaza me zyrtarët izraelitë. Ai nuk dha një itinerar për ndalesën e Witkoff në Moskë.

“Ai do të shkojë në Rusi. Besojeni ose jo”, u tha Trump gazetarëve.

Komentet vijnë disa orë pasi Zelensky bëri thirrje për “ndryshim regjimi” në Kremlin, duke thënë se kjo ishte e vetmja mënyrë për të parandaluar Rusinë nga përpjekja për të “destabilizuar” rajonin në të ardhmen.

Duke folur nga distanca në një aktivitet që shënonte 50 vjetorin e nënshkrimit të Aktit Final të Helsinkit të epokës së Luftës së Ftohtë, Zelenskyy më 31 korrik tha se besonte se ishte ende e mundur që aleatët perëndimorë ta “shtynin” Rusinë që të ndalonte luftën e saj ndaj Ukrainës./ REL