90 mln lekë abuzime me tendera, stafi i UBT del para GJKKO, gjyqtarët tërhiqen për vendim

Sot u zhvillua seanca gjyqësore për vlerësimin e 24 masave të sigurisë të caktuara ndaj stafit të Universitetit Bujqësor të Tiranës që akuzohen për abuzim me tenderat. Pas 4 orësh seancë, Gjykata e Posaçme kundër Korrupsionit dhe Krimit të Organizuar është tërhequr në dhomë këshillimi për vendim.

Një ditë më parë, GJKKO me kërkesë të SPAK ka lëshuar 24 urdhër arreste, 5 “arrest në burg”, 10 “arrest në shtëpi” dhe 9 “detyrim paraqitje” për stafin e Universitetit Bujqësor të Tiranës. Të arrestuarit janë Edmond Tërthorja, Amarildo Lleshi, Mehmet Qoshja, Altin Murto dhe Piro Zoga. Masa “arrest shtëpie” u vendos ndaj 10 personave të cilët janë Agim Sefa, Arjan Buliqi, Serafin Skënderi, Ilir Kusi, Dritan Laçi, Azem Parllaku, Artur Koleci, Radion Dhromi, Blenard Spaho dhe Tedi Proda. Gjithashtu janë firmosur 9 masa “detyrim paraqitje” për Enkeleida Sallaku, Klara Jahollari, Ilir Kapaj (zëvendësrektor), Erjola Kopali, Klea Lekocaj, Romina Koto (zëvendësrektore), Bejo Bizhga, Etleva Shore dhe Rezearta Dervishi.

SPAK ka zbuluar se Romina Koto, dhe Ilir Kapaj, me detyrë zëvendësrektorë në Universitetin Bujqësor të Tiranës dhe Bejo Bizhga, me detyrë përgjegjës i Departamentit të Moduleve Paraklinike; të gjithë në bashkëpunim me njëri-tjetrin, ideuan projekte dhe sigurimin e fondeve pranë Agjencisë Kombëtare për Kërkimin Shkencor dhe Inovacionin, pra tek AKSHI.

Hetimi në lidhje me dosjen kishte nisur përpara një viti dhe për të nxjerrë prova, janë përdorur edhe përgjimet telefonike nga celularët e personave të stafit pedagogjik. Më pas, nga administrimi i dokumentacionit të procedurave të prokurimit, SPAK ka arritur që të zbulojë se nga 9 procedura prokurimi të zhvilluara në vitin 2022, kapën vlerën e 90 milionë lekëve.