Zgjidhja e çështjes së Kosovës në vitin 2024/ Flet diplomati i njohur

Ish-diplomati Srećko Gjukiç beson se viti 2024 do të sjellë zgjidhjen e çështjes së Kosovës, por se gjithmonë ekziston rreziku i incidenteve

“Mendoj se të gjitha çështjet që kanë ekzistuar me vite dhe dekada do të hiqen nga rendi i ditës, gjë që do të relaksojë ndjeshëm marrëdhëniet mes Beogradit dhe Prishtinës. Në të njëjtën kohë, nuk mendoj se gjithçka do të shkojë mirë në zbatimin e Marrëveshjes së Ohrit. Me siguri do të ketë provokime. Por mendoj se çështja e Kosovës aktualisht është një nga temat kryesore në Bruksel, sepse durimit evropian po i vjen fundi, veçanërisht pasi vitin e ardhshëm do të kemi zgjedhje si në BE ashtu edhe në SHBA. Të gjithë do të donin një rezultat përpara atyre zgjedhjeve,” tha Gjukiç.

Ai pret gjithashtu që Prishtina të bëjë së paku një lëvizje në periudhën e ardhshme në zbatimin e Marrëveshjeve të Ohrit.

“Mund të jetë ose një hap drejt formimit të asociacionit ose para kësaj, relaksim i marrëdhënieve me serbët në veri të Kosovës. Kurti duhet të tregojë respekt për komunitetin serb. Në këtë kuptim, është e mundur që së shpejti të kemi zgjedhje lokale në veri të Kosovës që serbët të kenë përfaqësuesit e tyre në pushtet në katër komuna serbe”, vlerësoi Gjukic.

Siç tha ai, dialogu ndërmjet Beogradit dhe Prishtinës mund të përparojë shpejt vitin e ardhshëm.

“Shumë gjëra mund të realizohen shpejt nëse vendoset një masë besimi ndërmjet Beogradit dhe Prishtinës. Për fat të keq, gjithmonë ekziston rreziku që të shfaqet një incident si Banjska që mund të ngadalësojë gjithçka ose të ndryshojë rrjedhën e negociatave nga rrënja”- potencoi Gjukic.