Kreu i Partisë Demokratike, Sali Berisha ka mbajtur fjalimin e tij para mbështetësve të mbledhur në tubimin poshtë banesës së tij.

Berisha ftoi çdo qytetar të bashkohet në protestën e madhe dhe në mosbindjen civile tek Bashkia e Tiranës, sipas tij për çlirimin e saj.

Ish-kryeministri tha se “Erion Veliaj po bën gjithçka duke menduar se do t’ia hedhë. Pa kaluar mbi trupat tonë nuk ia hedh kurrë o hajdut.”

PJESË NGA FJALA E BERISHËS:

Mirëmbrëma dhe përshëndetjet më të përzemërta ju demokratëve, qëndrestarëve, misionarëve të vërtetë të lirisë, dinjitetit njerëzor, shpresës dhe besimit te Shqipëria. Të dashur miq, sonte në emër tuaj ftoj çdo shqiptar të bashkohet me ne në protestën e madhe, në mosbindjen civile, në zemërimin popullor tek Bashkia e Tiranës për çlirimin e saj.

Miq, Edi Rama është i aftë të instalojë çdo skenar. Të ndërmarrë çdo veprim, vetëm e vetëm të shpërqendrojë goditjen tonë, të shpërqendrojë betejën tonë, zemërimin tonë. Por ne, nesër jemi të gjithë te bashkia.

Jemi në revoltë. Jemi në mosbindje civile ndaj modelit dhe autorit të modelit të vjedhjes 100 përqind të shqiptarëve.
Ndaj poshtërimit të qytetarëve shqiptarë. Kundër tiranisë së vjedhjes së shqiptarëve, varfërimit, mjerimit të tyre, largimit të tyre të detyruar nga Shqipëria për shkak të skamjes dhe vrasjes së shpresës.

Qytetarë dhe qytetare, beteja kundër vjedhjes është beteja më civile, beteja më dinjitozë, beteja më e rëndësishme për fatin tonë dhe të ardhmen tonë. Në qoftë se ne u lejojmë fatin në duart e atyre që si lukuni na vjedhin ditën dhe natën, ne nuk kemi të ardhme.

Ne nuk kemi dinjitet. Ne kemi një gjallesë që nuk e meritojmë kurrë. Ndaj dhe le të ngrihemi ne në lartësinë e guximit tonë. Mençurisë sonë. Vendosmërisë tonë dhe t’i japim nesër Erion Velisë përgjigjen finale që ai meriton. Erion Veliaj po bën gjithçka duke menduar se do t’ia hedhë. Pa kaluar mbi trupat tonë nuk ia hedh kurrë o hajdut. Kurrë, kurrë! Ndaj dhe me guxim përpara. Me zemërim përpara. Fitore dhe vetëm fitore!

Deputeti i PD-së, Ervin Salianji, ka akuzuar kryeministrin Edi Rama se nuk kujdeset për interesat e qytetarëve dhe ka shfrytëzuar përplasjen dhe përçarjen e opozitës për ta varfëruar akoma dhe më shumë Shqipërinë.

Gjatë takimit me demokratët e Durrësit, Salianji komentoi takimin e Ramës në Athinë, ku sipas tij çoi që të gjithë shkaktarët e përzënies së qytetarëve shqiptarë.

Salianji: Janë ata njerëz që me kontributin e tyre të drejtëpërdrejtë në korrupsion në vjedhje me ngritjen në piedestal të injorancës në admininstratën publike, në prishjen e konkurrencës, në padrejtësitë që bëjnë një çdo cep të kësaj republike kanë bërë të mundur që sipas Eurostat 700 mijë shqiptarë të largohen nga Shqipëria. Dhe në ata 700 mijë shqiptarë që kanë ikur në vitet e fundit, e patë se si Edi Rama u detyrua të merrte bashkiakët nga Shqipëria, drejtorët nga Shqipëria, administratën nga Shqipëria e cila në mënyrën emblematike u përmblodh nga drejtori i Teatrit të Fierit.

Salianji tha se administrata, me kontributin e saj të drejtpërdrejtë në korrupsion dhe vjedhje ka bërë të mundur largimin e 700 mijë shqiptarëve.

Salianji: Kemi qeveri, një kryeministër, kemi qeveritarë që nuk kujdesen për interesat e qytetarëve. Kemi një qeveri e cila ka shfrytëzuar përplasjen dhe përçarjen tonë për ta varfëruar akoma dhe më shumë Shqipërinë. Për ta zhvendosur fokusin nga përmirësimi i cilësisë së jetës së qyetetarëve dhe për ta kthyer se çfarë po ndodh në PD.

E patë sot të gjithë se si në një aktivitet në Athinë, Edi Rama çoi që të gjithë shkaktarët e përzënies së qytetarëve shqiptarë, i kishte me vete. Për çfarë shkuan atje të gjithë kryetarët e bashkive? Për çfarë shkuan në Athinë të gjithë drejtuesit e administratës publike? Për çfarë shkuan atje të gjithë banditët të cilët i shërbejnë Edi Ramës si këtu si atje? Për ti treguar qytetarëve që janë larguar nga kjo qeverisje se këta janë fytyra e vërtetë që kanë përzënë familjarët tuaj, nipërit dhe mbesat apo fëmijët.

Janë ata njerëz që me kontributin e tyre të drejtëpërdrejtë në korrupsion në vjedhje me ngritjen në piedestal të injorancës në admininstratën publike, në prishjen e konkurrencës, në padrejtësitë që bëjnë një çdo cep të kësaj republike kanë bërë të mundur që sipas Eurostat 700 mijë shqiptarë të largohen nga Shqipëria. Dhe në ata 700 mijë shqiptarë që kanë ikur në vitet e fundit, e patë se si Edi Rama u detyrua të merrte bashkiakët nga Shqipëria, drejtorët nga Shqipëria, administratën nga Shqipëria e cila në mënyrën emblematike u përmblodh nga drejtori i Teatrit të Fierit.

Partia Socialiste ka propozuar së fundmi krijimin e një reforme të re anti-korrupsion.

Duket se ky propozim i PS, është mirëpritur nga delegacioni i BE këtu në Shqipëri me disa kushte.

Nëpërmjet një reagimi bëhet me dije se BE kërkon që kjo reformë të jetë ndërpartiake dhe të bëhet me konsultim gjithëpërfshirës.

“Delegacioni i BE-së mirëpret çdo nismë për të çuar më tej proceset e arritjeve të reformave të Shqipërisë për qeverisjen e mirë, shtetin e së drejtës dhe antikorrupsionin, duke u mbështetur te reformat dhe arritjet e mëparshme, si dhe në përputhje me parimin kushtetues të kontrollit dhe balancimit.

Ne theksojmë se është e rëndësishme të garantohet që kjo nismë do të zhvillohet në koherencë të plotë me gjetjet e raporteve të shqyrtimit analitik të legjislacionit (procesi screeening) dhe me angazhimet që ka marrë Shqipëria si pjesë e procesit të anëtarësimit në BE, si udhërrëfyesit për shtetin ligjor dhe administratën publike.

Për sa i përket sektorit të drejtësisë, vërejmë se parimi kryesor duhet të jetë pakthyeshmëria e reformës në drejtësi të vitit 2016.

Theksojmë se është me rëndësi jetike që procesi i propozuar parlamentar të jetë i bazuar në prova, transparent, të gëzojë mbështetje të fortë ndërpartiake dhe të mbështetet në një konsultim gjithëpërfshirës dhe kuptimplotë me të gjitha institucionet dhe palët e interesuara, përfshirë edhe shoqërinë civile.

Në kuadër të procesit të anëtarësimit të Shqipërisë në BE, BE-ja po ofron ndërkaq asistencë të madhe për Shqipërinë në fushat e qeverisjes së mirë, sundimit të ligjit dhe antikorrupsionit, si dhe është e gatshme të rrisë mbështetjen e vet, sipas rastit.”- thuhet në deklaratë.

Kreu i Policisë së Shtetit, Muhamet Rrumbullaku reagon pas vrasjes së efektivit Novruz Cenalia në Fier. Ndërsa shpreh ngushëllimet për familjen, Rrumbullaku thekson se kushdo që prek uniformën e policisë do të marrë përgjigjen më të ashpër ligjore.

DEKLARATË PËR SHTYP

Policia e Shtetit dhe unë personalisht ndjehemi thellësisht të tronditur nga vrasja e punonjësit të policisë Novruz Cenalia, mesditën e 13 Majit 2024. Ndarja e parakohshme nga jeta e një djali të ri si Novruz Cenalia na ka hidhëruar të gjithëve, familjen e tij, që është zhytur në lot e zi, dhe familjen e madhe të Policisë së Shtetit.

Për të gjithë ne, kjo dhimbje bëhet edhe më e hidhur kur jeta e një punonjësi të Policisë së Shtetit ndërpritet nga dora e një vrasësi, që ende është i lirë. Unë zotohem në emër të Policisë së Shtetit se, do të bëjmë gjithçka për ta vendosur para ligjit autorin e vrasjes së Novruz Cenalisë.

Shpreh bindjen se i gjithë opinioni publik ndodhet sot përkrah familjes Cenalia dhe Policisë së Shtetit dhe do të ndihmojë në kapjen e autorit të krimit.

E kam theksuar me forcë, edhe pak ditë më parë, gjatë ceremonive përkujtimore për të rënët e policisë, se uniforma e Policisë së Shtetit është e shenjtë. Kushdo që guxon të cenojë uniformën e policisë, shëndetin dhe jetën e punonjësve të saj, do të marrë përgjigjen më të ashpër ligjore.

Drejtori i Përgjithshëm i Policisë së Shtetit,

Drejtues Madhor Muhamet Rrumbullaku

Kreu i grupit parlamentar të Partisë Demokratike, Gazment Bardhi ka reaguar lidhur takimin e kryeministrit Edi Rama me emigrantët shqiptarë një ditë më parë në Athinë.

Reagimin e tij, Bardhi e ka shoqëruar me një video të publikuar nga emisioni investigativ “Piranjat”, ku një nga pjesmarrësit në takim, konkretisht drejtori i teatrit “Bylis” të Fierit, Klajdi Marku, e ka shprehur hapur pakënaqësinë e prezencës së tij aty.

Kreu i grupit demokrat shkruan se ajo video është sipas tij dëshmi rastësore “për të kuptuar se deri ku arrin Edi Rama në keqpërdorimin e burimeve shtetërore për zgjedhje apo veprimtari politike.” Ai e ka cilësuar vizitën e Ramës si takim politik me punonjës të administratës të importuar me detyrim në Athinë, ndërsa shtoi se kjo duhet “të zgjojë nga gjumi” menjëherë organin e prokurorisë.

REAGIMI I PLOTË I BARDHIT: 

Edi Rama është armik i votës së lirë dhe për këtë as nuk fshihet dhe as nuk turpërohet. Mjafton kjo dëshmi rastësore për të kuptuar se deri ku arrin Edi Rama në keqpërdorimin e burimeve shtetërore për zgjedhje apo veprimtari politike.

Pas detyrimit për anëtarësim në Partinë Socialiste të të gjithë punonjësve të administratës shtetërore, keqpërdorimi ka rritur kulmin përmes detyrimit të tyre për të marrë pjesë në një veprimtari politike të Edi Ramës, që ishte shpallur si takim me bashkëqytetarët tanë që jetojnë në Greqi, dhe përfundoi në një takim me punonjës të administratës shtetërore të imoportuar me detyrim nga Shqipëria për në Athinë.

Nëse Edi Rama i intimidon punonjësit e administratës shtetërore që jashtë vullnetit të tyre të shkojnë deri në Athinë për takime politike, secili qytetar shqiptar duhet të imagjinojë vetë se deri ku shkon presioni dhe keqpërdorimi gjatë fushatës zgjedhore apo imponimit të votës brenda vendit.

Ajo që ka ndodhur me takimin në Athinë, ku punonjës të administratës shtetërore u importuan nga Shqipëria për të mbushur sallën një takim politik të Edi Ramës, duhet të zgjojë nga gjumi menjëherë organin e prokurorisë. Përdorimi i funksionit publik për veprimtari politike ose zgjedhore është krim dhe dënohet sipas nenit 328/a të Kodit Penal. Është koha për të vepruar tani dhe pa asnjë vonesë, ndryshe zgjedhjet e ardhshme parlamentare janë në rrezik.

Apeli im shkon edhe për faktorin ndërkombëtar, veçanërisht Komisionin Europian, për të nxitur përmbylljen në kohë të Reformës Zgjedhore, ku duhet të adresohen rekomandimet e OSBE-ODIHR lidhur me keqpërdorimin e burimeve shtetërore dhe shkrirjen e shtetit dhe partisë në një të vetme gjatë zgjedhjeve. Kjo minon jo vetëm demokracinë, por vendos në pikëpyetje vetë stabilitetin e vendit dhe të ardhmen europiane të Shqipërisë. Mungesa e barazisë në zgjedhje dhe favorizimi shtetëror i partisë në pushtet, paracakton rezultatin zgjedhor dhe garën e ndershme mes palëve.

Është momenti që në vitin 2025 Shqipëria, një vend anëtar i NATO-s dhe vend kandidat për anëtar të BE, të organizojë zgjedhje të lira dhe të ndershme, ndryshe instalimi i partisë-shtet do të jetë i pakthyeshëm!