“Nuk duam luftë, por nuk do dorëzohemi!/ Presidenti iranian sfidon sërish Izraelin dhe SHBA-në

Presidenti iranian Masoud Pezeshkian tha të martën se vendi i tij nuk kërkon të sigurojë armë bërthamore, por do të vazhdojë të mbrojë “të drejtat e tij legjitime” ndërsa hyn në fuqi një armëpushim me Izraelin.

“Ne presim që ju t’u shpjegoni atyre, në negociatat tuaja me Shtetet e Bashkuara, se Republika Islamike e Iranit kërkon vetëm të mbrojë të drejtat e saj legjitime. Ne jemi të hapur për dialog, jo për imponime”, tha Pezheskian gjatë një bisede telefonike me Presidentin e Emirateve të Bashkuara Arabe Mohammed bin Zayed , sipas agjencisë zyrtare të lajmeve IRNA .

Ai shtoi se Irani është gati të zgjidhë çështjet që do të vendosen në tryezën e negociatave.  Pezeshkian theksoi  gjithashtu se Izraeli dhe Shtetet e Bashkuara nuk mund të imponojnë ambiciet e tyre të padrejta me forcë.

“Republika Islamike e Iranit u detyrua të angazhohej në një konflikt ushtarak për të mbrojtur veten dhe shpresoj se nuk do të detyrohemi kurrë të luftojmë përsëri”, tha Pezheskian.

Më parë, presidenti iranian e bëri të qartë se vendi i tij do të respektonte armëpushimin e shpallur nga Presidenti i SHBA-së Donald Trump, me kusht që Izraeli gjithashtu t’i përmbahet kushteve të tij.

“Nëse regjimi sionist nuk e shkel armëpushimin, as Irani nuk do ta shkelë atë”, tha Pezheskian gjatë një bisede telefonike me kryeministrin malajzian Anwar Ibrahim , sipas faqes së internetit të presidencës iraniane.