Do ketë pasoja/ Osmani: Kosova mund të përballet me krizën më të rëndë kushtetuese

Presidentja e Kosovës, Vjosa Osmani, ka thënë se vazhdon të mbetet e paqartë se çfarë do të ndodhë pas 26 korrikut, dhe për këtë arsye do të kërkojnë sqarim nga Gjykata Kushtetuese në disa çështje përmes lëndës që do ta dërgojnë atje.

Osmani ka njoftuar se, nëse deputetët vazhdojnë të mos e konstituojnë Kuvendin, në fillim të javës do t’i drejtohen Kushtetueses.

Ndër të tjera, ajo ka sqaruar sërish se nuk është në rolin e saj të negociojë koalicionet politike.

“Ne vazhdojmë takimet, megjithatë, nuk është roli i asnjë presidenti të negociojë koalicionet, unë e kam atë të ndaluar me Kushtetutë. Në të njëjtën kohë, Kushtetuta nuk lejon që në këtë fazë presidentja të shpërndajë Kuvendin dhe ta dërgojë vendin në zgjedhje. Duhet të plotësohen disa kritere ligjore që akoma nuk janë plotësuar për një veprim të tillë” – theksoi Osmani, duke shtuar se nëse nuk respektohet afati kushtetues, duhet të ketë pasoja juridike.

Përpjekja e 48-të për zgjedhjen e përbërjes së re të legjislaturës së nëntë dështoi sërish të enjten, ndërsa afati kushtetues për formimin e institucioneve vazhdon të rrjedhë pa sinjale për zgjidhjen e nyjës që ka mbërthyer vendin pas zgjedhjeve të 9 shkurtit.

Gjykata Kushtetuese e ka përcaktuar 26 korrikun si afatin e fundit për konstituimin e Kuvendit të Kosovës, megjithatë subjektet politike nuk duket të jenë as afër ndonjë zgjidhjeje apo marrëveshjeje politike për të dalë nga kjo situatë.