A rrezikon të përhapet lufta në rajon? Turqia paralajmëron Izraelin për kundërpërgjigje nëse sulmohen

Ministri i Jashtëm turk, Hakan Fidan ka deklaruar se Turqia nuk do të hezitojë të përgjigjet nëse kërcënohet, duke e cilësuar politikën e Izraelit si të rrezikshme për stabilitetin rajonal dhe duke e krahasuar atë me “çmendurinë e Hitlerit”. Ai theksoi se Ankaraja nuk kërkon konflikt, por do të mbrojë veten nëse është e nevojshme, me një mesazh të qartë: kushdo që e kërcënon Turqinë, do të përballet me pasojat.

Këto deklarata vijnë menjëherë pasi Turqia ndërpreu të gjitha lidhjet tregtare me Izraelin, ndaloi anijet izraelite në portet e saj dhe mbylli hapësirën ajrore për avionët izraelitë. Vendimi u bë i ditur gjatë një seance të jashtëzakonshme të parlamentit turk, në përgjigje të ofensivës izraelite në Rripin e Gazës.

Marrëdhëniet mes dy vendeve janë përkeqësuar ndjeshëm, sidomos pas majit 2024, kur Turqia ndaloi eksportet dhe importet me Izraelin, përfshirë produkte strategjike si çelik dhe çimento, pas refuzimit të Tel Avivit për të lejuar ndihmat humanitare në Gaza. Ndërkohë, Turqia përballet edhe me sfida të tjera rajonale dhe po përpiqet të ruajë një rol aktiv në diplomacinë e Lindjes së Mesme.