Ajo qeveri që themelon Asociacionin do shkelë Kushtetutën e Kosovës

Jason Steinbaum, ekspert nga Grupi për Politikat dhe të Drejtën Ndërkombëtare Publike në Uashington të Shteteve të Bashkuara (SHBA), ka thënë se themelimi i Asociacionit të Komunave me Shumicë Serbe nga ekzekutivi aktual apo kushdo tjetër që vjen në pushtet në Kosovë, shkon kundër Kushtetutën e Kosovës.

Në një intervistë për “Zërin e Amerikës”, duke folur rreth raportit të fundit të organizates që ka vlerësuar se kërkesa e SHBA-së për të themeluar Asociacionin e Komunave me Shumicë Serbe është në thelb anti-kushtetutese, ai ka thënë sipas aktit më të lartë juridik vetëm komunat kanë autoritetin për të krijuar asociacione.

Megjithatë, ai ka shtuar se në mënyrë që komunat ta bëjnë këtë veprim, pra ngritjen e një asociacioni, duhet të kenë zyrtarë të zgjedhur dhe kjo do të thotë që komuniteti serb në pjesën veriore të Kosovës duhet të marrë pjesë në zgjedhje, proces të cilin e kanë bojkotuar herën e fundit për shkak të trysnisë nga shteti i Serbisë.

Ndryshe, përkundër se autoritetet kosovare kanë pasur mundësinë për 10 vjetët e fundit të përpunojnë një koncept të përshtatshëm për Asociacionin e Komunave me Shumicë Serbe – një detyrë urgjente juridikisht, ashtu edhe në aspektin urtisë politike – këtë hap nuk e ka bërë askush, përveç ekspertëve ligjorë të Francës dhe Gjermanisë.

SHBA-të duan lëvizje konkrete drejt themelimit të Asociacionit të Komunave me Shumicë Serbe, posaçërisht dërgimin e draft-statutit të propozuar së fundi nga Bashkimi Evropian (BE) për këtë mekanizëm në Gjykatën Kushtetuese të Kosovës.

Gjykata Kushtetuese e Kosovës nuk mund ta shqyrtojë draft-statutin për Asociacionin e Komunave me Shumicë Serbe derisa ta dekretojë Qeveria e Kosovës, ndonëse bashkësia ndërkombëtare e konsideron “hap të parë” drejt garantimit të “një niveli adekuat të vetëmenaxhimit” për serbët që përbëjnë shumicën në veri të Kosovës.